Qostanaılyq fermerler kúnbaǵysty shetelge erkin satqysy keledi
ASTANA. KAZINFORM — Qostanaı dıqandary kúnbaǵys eksportyna salynatyn baj salyǵyn ýaqytsha toqtatýdy usyndy. Bul týraly Kazinform agenttiginiń tilshisi habarlaıdy.
Qostanaı oblysynyń aýyl sharýashylyǵy taýaryn óndirýshiler qaýymdastyǵy QR Aýyl sharýashylyǵy mınıstrligine maıly daqyldar naryǵyn retteý tetikteri men óńdeý kásiporyndaryna kórsetiletin memlekettik qoldaý sharttaryn qaıta qaraý týraly usynys joldady.
Qaýymdastyq ókilderiniń pikirinshe, qoldanystaǵy eksporttyq baj salyǵy fermerlerdiń kúnbaǵysty syrtqy naryqqa satý múmkindigin shekteıdi. Qazir onyń mólsheri kedendik qunnyń 20 paıyzyn quraıdy, biraq ár tonnasyna keminde 100 eýro belgilengen.
Qaýymdastyq kúnbaǵys joǵary tabysty daqyldardyń biri bolyp qala beretinin, al Qazaqstanda óndiriletin ónim kólemi otandyq maı zaýyttaryn shıkizatpen qamtamasyz etýge jetkilikti ekenin atap ótti.
Sonymen qatar agrarıılerdiń pikirinshe, qoldanystaǵy shekteýler óndirýshilerdi óńdeý kásiporyndary belgileıtin satyp alý baǵasyna táýeldi etedi.
Qaýymdastyqtyń baǵalaýynsha, Reseıde kúnbaǵystan rekordtyq ónim jınalýy jáne Ortalyq Azııa elderine reseılik maı jetkiziliminiń artýy Qazaqstan naryǵyna qosymsha qysym túsirýi múmkin.
Ótinishte óńdeý salasynyń birqatar memlekettik jeńildikterdi paıdalanatyny da aıtylǵan. Olardyń qatarynda jeńildetilgen nesıe, kólik shyǵyndaryn sýbsıdııalaý, temirjol tarıfteriniń tómendetilýi jáne jemshóp óndirisin qoldaý sharalary bar.
Jaǵdaıdy ózgertý úshin qaýymdastyq eki sharany usyndy:
-
Maı zaýyttaryna sýbsıdııalar, jeńildikter men kólik preferentsııalaryn tek qazaqstandyq shıkizatty 100 paıyz paıdalanǵan jaǵdaıda ǵana berý;
-
Óńdeý kásiporyndarynda shıkizat jetkilikti bolǵan kezeńde otandyq aýyl sharýashylyǵy taýaryn óndirýshiler úshin eksporttyq baj alýdy ýaqytsha toqtatý.
Bastamashylardyń pikirinshe, bul ózgerister kúnbaǵys satyp alýshylar arasyndaǵy básekelestikti kúsheıtip, suranys pen usynys negizinde naryqtyq baǵanyń qalyptasýyna múmkindik beredi.
Qaýymdastyq Aýyl sharýashylyǵy mınıstrliginen usynystardy qoldap, olardy respýblıkalyq deńgeıde qaraýdy bastaýǵa ótinish bildirdi.
Buǵan deıin elimizden ósimdik maıyn qaı elder kóptep satyp alatynyn jazdyq.
