Qostanaılyq fermerler kıikterge baılanysty egis alqaptaryn 30%-ǵa qysqartýy múmkin
ASTANA. KAZINFORM — Qostanaı oblysynyń agrarshylary egis alqaptaryn úshten birge qysqartý qaýpi jáne qaryz júktemesiniń artýy týraly málimdedi, dep jazady Kazinform tilshisi.
Kásipkerler palatasynda ótken salalyq keńes otyrysynda fermerler kıikterden kelgen shyǵyn, tuqym baǵasynyń qymbattaýy jáne jeńildetilgen nesıeleýdegi kemshilikter máselesin kóterip, qoldanystaǵy qoldaý sharalaryna ózgerister engizýdi usyndy.
Eń kóp talqylanǵan máselelerdiń biri — kıikten keletin zııan. Fermerler túrli mınıstrlikterge birneshe ret júgingenimen, máseleniń naqty sheshimi áli tabylmaǵan.
Agrarshylardyń aıtýynsha, Torǵaı óńirinde kıikter egistikke aıtarlyqtaı zııan keltirgen. «Dıevskaıa» agrofırmasynyń dırektory Oleg Danılenkonyń sózinshe, kóptegen sharýashylyq ónimdi jınaı da almaǵan. Qazir fermerler nesıelerin qalaı óteıtinin bilmeı otyr.
— Bıyl biz shamamen egis alqaptarynyń 30 paıyzyn múlde ekpeýimiz múmkin, degenmen ylǵal da bar, tuqym da bar, adamdar da jumys isteýge daıyn, — dedi ol.
Bul jaǵdaı veterınar mamandardy da alańdatyp otyr. Olar kıikter arasynda aýsyl aýrýy taralýy múmkin ekenin joqqa shyǵarmaı, onyń aldyn alý sharalaryn usynyp otyr.
Aýyl sharýashylyǵy taýar óndirýshileri qaýymdastyǵy egistikti taptaý saldarynan kelgen shyǵyndy bıýdjet esebinen óteýdi jáne saqtandyrý júıesin engizýdi usyndy. Sonymen qatar fermerler egistik alqaptarynda kıikterdi maýsym boıy atýǵa ruqsat berýdi surap otyr.
Taǵy bir mańyzdy másele — tuqym baǵasynyń kúrt ósýi. «Zarıa» AQ basshysy Aleksandr Klımkonyń aıtýynsha, bir jylda tuqym quny shamamen eki ese ósip, tonnasy 700 myń teńgeden 1,4 mıllıon teńgege jetken. Qoldanystaǵy sýbsıdııalar shyǵynnyń az ǵana bóligin jabady.
Osyǵan baılanysty fermerler sýbsıdııalaý normatıvterin arttyrýdy jáne tuqym baǵasyna baqylaýdy kúsheıtýdi usynady.
Sondaı-aq agrarshylar nesıe berý sharttaryn qaıta qaraýdy talap etip otyr. Olardyń aıtýynsha, qazirgi baǵdarlamalar naqty shyǵyndardy tolyq eskermeıdi.
— Mysaly, jyl sońynda jerdi daıyndaýǵa ketken shyǵyndar kelesi maýsymǵa qarjylandyrý bólingen kezde esepke alynbaıdy. Biz bul shyǵyndardy óteýdi usynamyz, — dedi qaýymdastyq dırektory Svetlana Mıhaılenko.
Budan bólek, fermerler jeńildetilgen nesıe tizimin keńeıtip, oǵan statsıonarlyq keptirý qondyrǵylaryn engizýdi surap otyr. Barlyq usynys tıisti mınıstrlikterge joldanbaq.
Jaqynda Batys Qazaqstan oblysynda aýrý kıikterdiń dalada júrgendigi týraly áleýmettik jelide beınejazba tarady.
