Qostanaılyq erli-zaıyptylar veterınarııalyq anyqtamalardy qoldan jasap kelgen

ASTANA. KAZINFORM — Qostanaı oblysynyń prokýrorlary jalǵan veterınarııalyq anyqtama bıznesin toqtatty, dep habarlaıdy vedomstvonyń baspasóz qyzmeti.

Tergeý barysynda Áýlıekól aýdanynyń aýmaǵynda turatyn erli-zaıyptylar 2024 jylǵy jeltoqsan men 2025 jylǵy tamyz aralyǵynda  túrli-tústi prınterdi paıdalana otyryp, veterınarııalyq anyqtamalardy qoldan jasaǵany anyqtaldy.

— Qostanaı oblysynyń prokýratýrasy veterınarııalyq anyqtamalardy qoldan jasaý jáne olardy odan ári ótkizý faktisi boıynsha qylmystyq is boıynsha aıyptaý aktisin bekitti. Tergeý barysynda Áýlıekól aýdanynyń aýmaǵynda turatyn erli-zaıyptylar 2024 jylǵy jeltoqsan men 2025 jylǵy tamyz aralyǵynda óz úılerinde túrli-tústi prınterdi paıdalana otyryp, keıinnen aqshalaı syıaqyǵa satylatyn 1-nysandy (mal men et ónimderin tasymaldaý quqyǵyn bildiretin) veterınarııalyq anyqtamalardy qoldan jasaǵany anyqtaldy. Olardyń áreketteri QR Qylmystyq kodeksiniń 385-baby 2-bóligi boıynsha, atap aıtqanda, aldyn ala sóz baılasý boıynsha toppen birneshe ret jasalǵan resmı qujatty qoldan jasaý jáne ótkizý boıynsha saralanǵan, — delingen Qostanaı oblysynyń prokýratýrasy taratqan málimette.

Aıta keteıik, baptyń sanktsııasy 4 jylǵa deıin bas bostandyǵynan aıyrýdy kózdeıdi. Qazir qylmystyq is Áýlıekól aýdandyq sotyna joldandy.

Budan buryn Joǵary aýdıtorlyq palata júrgizgen aýdıtten keıin veterınarııalyq, fıtosanıtarııalyq jáne azyq-túlik qaýipsizdigin qamtamasyz etýge jaýapty birqatar laýazymdy adam men maman tártiptik jaýaptylyqqa tartyldy.