Qostanaılyq bloger kásipkerden 20 mln teńge bopsalaǵany úshin 7,5 jylǵa sottaldy
QOSTANAI. KAZINFORM – Qostanaı oblysynda sot kásiporynnan beınejazbany óshirý úshin iri kólemde aqsha talap etken er adamǵa úkim shyǵardy, dep habarlaıdy Kazinform agenttiginiń tilshisi.
Qylmystyq ister jónindegi mamandandyrylǵan aýdanaralyq sot Qarabalyq aýdanynyń turǵynyna qatysty isti qarady. Oǵan asa iri kólemde bopsalaý baby boıynsha aıyp taǵyldy.
Sot málimetinshe, ótken jylǵy aqpanda er adam kásiporyn aýmaǵynan sanıtarlyq talaptardy buza otyryp, qyrylǵan jáne jaramsyz dep tanylǵan qustyń syrtqa shyǵarylyp jatqanyn vıdeoǵa túsirgen. Keıin ol jazbany óziniń YouTube arnasynda jarııalaǵan.
– Osydan keıin kásiporyn ákimshilik jaýapkershilikke tartyldy. Kompanııa ókili er adamǵa beınejazbany óshirý týraly ótinishpen júgingen. Kezdesý barysynda sottalýshy ózinde osyǵan uqsas ózge de jazbalar bar ekenin aıtyp, «máseleni retteýdi» usynǵan – ne ózine Shacman júk kóligin berýdi, ne 20 mıllıon teńge tóleýdi talap etken. Osydan soń kompanııa quqyq qorǵaý organdaryna júgindi. Tergeý áreketteri barysynda er adam aqshany alýǵa kelisip, ony berý tásilin de ózi usynǵan. Qarajatty úıiniń qorshaýynan asyryp laqtyrýdy suraǵan. Nátıjesinde kásiporyn ókili oǵan 15 mıllıon teńge bergennen keıin er adam ustaldy, – delingen sottyń baspasóz qyzmeti taratqan habarlamada.
Sot otyrysynda aıyptalýshy kinásin moıyndamady. Prokýror oǵan 10 jyl bas bostandyǵynan aıyrý jazasyn suraǵan. Alaıda sot onyń kámeletke tolmaǵan balasynyń bolýyn jeńildetetin mán-jaı retinde eskerdi.
Nátıjesinde ol ortasha qaýipsizdik mekemesinde jazasyn óteý arqyly 7 jyl 6 aıǵa bas bostandyǵynan aıyryldy.
Úkim ázirge zańdy kúshine engen joq.
Eske salsaq, Oralda bopsalaý jáne tonaýmen aınalysqan qylmystyq top quryqtaldy.
