Qostanaılyq áıel elimizdiń barlyq óńirin poıyzben jalǵyz aralap shyqty
AQTÓBE. KAZINFORM — Nadejda Shvets Qazaqstannyń barlyq óńirin 25 kúnde aralap shyqqan. Ol ár qalada týrıstik oryndarǵa baryp, tanysty.
Qostanaı oblysy Rýdnyı qalasynyń turǵyny Nadejda Shvets bıyl naýryz aıynda Qazaqstannyń barlyq aımaǵy men iri megapolısterin aralaýdy oıǵa alǵan. Al 21-naýryz kúni jolǵa shyqty. Ol bir qaladan ekinshi bir qalaǵa tek poıyzben bardy. Sóıtip 14-sáýirge deıin el ishindegi tarıhı-mádenı jáne týrıstik oryndardy aralady. Barlyǵyna 25 kún qajet boldy.
— Astana, Almaty, Shymkent pen barlyq óńirdi túgel aralap shyqtym. Ár qalaǵa barǵan kezde aldymen adamdardan «qaıda barýǵa bolady» dep keńes surap aldym. Jergilikti turǵyndardyń kóbi «eshteńe joq» dep qysqa qaıyrady. Biraq bul qate túsinik. Sodan soń «Qalanyń qyzyqty 20 jerin tap» dep izdeýge júkteımin. Onda da kóp nárse usyna almaıdy. Ár ólkeniń, ár óńirdiń ózine tán ereksheligi bar. Taǵy bir tańqaldyrǵany, qaıda barsam da adamdar ashyq-jarqyn, qonaqjaı. Poıyzben Qazaqstandy jalǵyz aınalyp shyqqan alǵashqy áıel ekenmin. Sondyqtan Qazaqstannyń rekordtar kitabyna suranys jasadym, — dedi týrıst Nadejda Shvets.
Qostanaılyq turǵyn Aqtóbede alǵash ret 10-11 sáýir kúnderi boldy. Arada 10 kún ótkende qaıta kelip, «Qasqyr sarqyramasy» festıvaline qatysty. Onyń aıtýynsha, áıel tek otbasy men oshaq qasynyń emes, óz qyzyǵýshylyǵynyń da qamyn oılaýy tıis.
— Áıel jalǵyz ózi týrıst retinde jolǵa shyqqan emes. Biz otbasy, bala-shaǵa dep júre beremiz. Elimizdi aralaýǵa ýaqyt ta, kúsh te tappaımyz. Ózim el ishin poıyzben aralaǵan kezde qandaı da kedergi, qıyndyqqa kezikpedim. Platskart oryndardy tańdadym, adamdarmen sóılestim. Astana-Qaraǵandy-Kókshetaý-Petropavl-Pavlodar-Semeı-Óskemen-Taldyqorǵan-Qonaev-Almaty-Taraz-Shymkent-Túrkistan-Qyzylorda-Jezqazǵan-Aqtaý-Atyraý-Aqtóbe-Oral-Qostanaı. Bul meniń marshrýtym. Birinshi ret osyndaı qadamǵa bardym jáne esh ókinbeımin. Otbasymyzdyń óz kásibi bar. Kúıeýim balyq sharýashylyǵyn damytyp otyr. Ózim úı sharýashylyǵyndaǵy áıelmin, eki balanyń anasymyn. Kúıeýim meniń oıymdy, armanymdy qoldady. Ári qalalardy aralaǵanda birneshe jańa bıznes ıdeıalardy da oıǵa túıip aldym. Aldaǵy ýaqytta iske asyrýymyz da múmkin, — dedi ol.
Nadejda Shvetstiń aıtýynsha, otbasyndaǵy senim el ishin alańsyz aralaýǵa múmkindik berdi. Oǵan shetel emes, qazaq jeriniń ár qalasy qyzyqty.
— Qaraǵandyda Naýryz meıramyn tamashaladym. Kókshetaýda taýǵa shyǵyp, qalany joǵarydan tamashaladym. Sol sátten bastap men ár qalany beınekameraǵa túsirip aldym. Al Petropavlǵa kelgende adamdar meni tanı bastady. Ol óńirde botanıkalyq baq unady. Pavlodarda mamonttyń súıegin kórdim, Qapshaǵaıda retroavtony qaradym. Almatynyń keremeti óz aldyna bólek qoı. Taraz qalasynda eski bazar bar. Túrkistan da erekshe. Aqtóbe qalasynda planetarııge bardym. Munda ulttyq taǵamdar daıyndaıtyn meıramhanamen tanystym. Al Vizit ortalyǵynda ІT hab ta ornalasqan. Bul jerde týrmarshrýttarmen tanysýǵa bolady, — dedi ol.
Nadejda Shvets aldaǵy ýaqytta barlyq óńirdiń keremetterin kórsetip, shaǵyn fılm qurastyrmaq. Sonymen birge ózi qaǵazǵa túsirgen 80 armanynyń árqaısysyn oryndaýdy qolǵa aldy. Biri el ishin aralaý bolǵan. Ony maqsatty túrde iske asyrdy.
@domokhozyayka_s_mechtami Nejnyı Taraz #taraz_kazakstan🇰🇿🇰🇿🇰🇿🇰🇿 #taraz #20gorodovkazahstanasnadejdoı #jdjenskıımarafon #qazaqstan @Novostı Taraz @taraz_news.kz @𝐓𝐀𝐑𝐀𝐙 𝐍𝐄𝐖𝐒 ♬ orıgınalnyı zvýk - domokhozyayka_s_mechtami
Aıta keteıik, elde týrıstik baǵyttarǵa jol salynyp jatyr. «Beıneý — Sekseýil» baǵyty erekshe mańyzǵa ıe, ol bolashaqta Kaspıı teńizine aparatyn joldy ashady. «Ortalyq — Batys» dálizi Torǵaı óńirindegi týrıstik aımaqtardy elordamen baılanystyryp, saıahatshylar úshin jańa baǵyttardy qalyptastyrady.
