Qostanaılyq áskerı qyzmetshiler jolda qalǵan júrgizýshige kómektesti
QOSTANAI. KAZINFORM – Qazaqstan Respýblıkasy Ulttyq ulany «Ortalyq» óńirlik qolbasshylyǵynyń 6697 áskerı bóliminiń áskerı qyzmetshileri avtokóligi Qostanaı-Arqalyq tas jolynyń shetine shyqqan júrgizýshige kómek kórsetti.
Sý tasqynyna qarsy is-sharalarǵa qatysý úshin Arqalyq qalasyna bet alǵan áskerı qyzmetshiler jolda qarǵa batqan kólikti baıqaǵan. Olar kólikterinen túsip, júrgizýshige járdemdesti. Jedel is-qımyldyń arqasynda áskerı qyzmetshiler kólikti qar úıindisinen shyǵaryp aldy.
— Qatty tuman bolǵandyqtan, men róldi ıgere almaı jol shetine shyǵyp kettim. Ulttyq ulannyń áskerı qyzmetshileri birden kómekke keldi jáne meniń kóligimdi basqa kólik júrgizýshisimen birge shyǵardy. Olarǵa aıtar alǵysym sheksiz, - dedi júrgizýshi Erjan Ospanov.
Osydan keıin áskerı qyzmetshiler Arqalyqqa baryp, óz jolyn jáne qyzmettik mindetterin oryndaýdy jalǵastyrdy.
Buǵan deıin Aqtóbede polıtsııa qyzmetkeri jol apatyna túskenin jazǵan edik.