Qostanaıǵa jyl basynan beri 100 dáriger keldi
QOSTANAI. QazAqparat - Bıyl Qostanaı oblysynda dárigerler tapshylyǵyn joıý úshin júıeli jumystar júrgizilýde. Bul týraly oblystyq densaýlyq saqtaý basqarmasynyń basshysy málim etti, dep habarlaıdy QazAqparat tilshisi.
Bıyl emdeý mekemelerine 100-ge jýyq dáriger tartyldy. Olardyń arasynda onkologtar, bala dárigerleri, terapevt jáne hırýrgııa salasynyń mamandary bar. Sonda da, oblys aýrýhanalary men emhanalarynda aq jeleńdiler qat. Kadr tapshylyǵy - densaýlyq saqtaý salasy basshylarynyń bas aýrýyna aınalǵan basty másele.
«Oblys aýrýhanalaryna shamamen 400-ge jýyq dáriger jetispeıdi. Sonyń kesirinen týberkýlez, ana men bala ólimi, qan aınalý júıesi, qaterli isik aýrýlar boıynsha óńirimiz táýir kórsetkishke qol jetkize almaı keledi», - dedi oblystyq densaýlyq saqtaý basqarmasynyń basshysy Erkin Dáýitbaev.
Basshynyń málimetinshe, dárigerler tapshylyǵyn joıý úshin júıeli jumystar júrgizilýde. Mysaly úshin, jas mamandardy tartý maqsatynda Batys Qazaqstannyń medıtsınalyq ýnıversıtetimen kelisim jasalǵan. Memlekettik- jekemenshik áriptestik negizinde Rýdnyı jáne Zatobol kentinde 250 orynǵa shaqtalǵan emhana salý josparlanǵan.
Densaýlyq saqtaý basqarmasynyń basshysy medıtsınalyq jabdyqtar máselesine toqtaldy. Oblystyq aýrýhanada angıograf isten shyqqan. Memlekettik-jekemenshik áriptestik negizinde quny 430 mln teńge bolatyn osyndaı apparat satyp alý kózdelgen.
