Qostanaıǵa ońtústik óńirlerden 4 myń adam kóship bardy

ASTANA. QazAqparat – Qostanaı oblysyna kóship kelgen azamattarǵa turǵyn úı sertıfıkattary beriledi. Qonys aýdarýshylarǵa jasalatyn jańa múmkindikter týraly óńir ákimi Qumar Aqsaqalov aıtyp berdi, dep habarlaıdy QazAqparat tilshisi.

«Sońǵy 5 jylda, 2017 jyldan bastap, Qostanaı oblysyna 6 myń adam kóship keldi. Onyń 4 myńy ońtústik óńirlerden kóship kelse, 2 myńy – qandastarymyz. Barlyǵyna memleket tarapynan tıisti kómek berildi, 70 mınımaldyq eseptik kórsetkish boıynsha árbir otbasy múshesine tólem jasaldy», - dedi Q. Aqsaqalov elordada Ortalyq kommýnıkatsııalar qyzmetinde.

Bıylǵy 1 qańtardan bastap, oblysta turǵyn úı sertıfıkaty engizildi. Kóship kelemin degen azamattarǵa 4 mln teńgege deıin sertıfıkattar beriledi.

«Búginge 176 otbasyna osyndaı sertıfıkat berýge qarajat daıyndap otyrmyz. Biraz azamat osy mehanızmdi paıdalandy. Árıne, aımaqta jańa jumys oryndaryn ashamyz, qalada da, aýylda da biraz jumystar bar», - dedi spıker.

Sonymen birge, ákim shekara shebindegi aýyldar máselesi óte ózekti bolyp otyrǵanyn aıtty.

«Bizdiń oblysta shekara mańynda 20 shaqty aýyl bar. Ókinishke oraı, sońǵy kóshi-qon áserinen biraz adam kóship ketti. Biraq bul aýyldar shekarada bolǵandyqtan, olardyń strategııalyq mańyzy bar. Úkimettiń shekara mańyndaǵy aýyldardy damytý, qarajat bólý jóninde úlken baǵdarlamasy bar. Ózimiz de oblystyq bıýdjetten aqsha únemdelse, ylǵı osy aýyldarǵa berýge tyrysamyz. Adamdar ınfraqurylym bolmasa kóshýge májbúr bolady. Sol úshin eń aldymen jol salyp, sý tartyp, emhana salyp, mektepterdi saqtap qalýǵa tyrysamyz», - dedi Qumar Aqsaqalov.

Aıta keteıik, búgin Qostanaı oblysynyń ákimi Qumar Aqsaqalov elordada 5 aıdaǵy áleýmettik-ekonomıkalyq damý jóninde esep berdi.