Qostanaıǵa Frantsııa elshisi bastaǵan delegatsııa keldi

Mártebeli meımandar oblystyq máslıhattyń depýttarymen kezdesip, eki el arasyndaǵy iskerlik qarym-qatynas týraly áńgimeledi.

Kezdesý barysynda oblystyq máslıhattyń hatshysy Saılaýbek Eşanov elshilerge aımaqtyń ekonomıkalyq damýy jáne ekijaqty yntymaqtastyqty jetildirý baǵyttary jaıynda habardar etti. Sondaı-aq, óńirde ken óndirý ónerkásibine, aýyl sharýashylyǵy, sonyń ishinde astyq, mashına jasaý óndirisine erekshe den qoıylyp kele jatqandyǵyn jetkizdi.

Munan soń Qostanaı áleýmettik-tehnıkalyq ýnıversıtetiniń rektory Qadyrǵalı Jamanbalın men Qostanaı polıtehnıkalyq kolledjiniń dırektory Alma Dosjanova elimizdegi bilim salasy, ǵylymı-ınnovatsııalyq baǵdarlamalar men dýaldi oqytý júıesi jaıly sóz qozǵady. Óz kezeginde Fılıpp Martıne eki el arasyndaǵy qarym-qatynastyń negizi osydan jıyrma bes jyl buryn bastaý alǵanyn atap ótti.

«Sol kezde Nursultan Nazarbaev Frantsııaǵa kelgen resmı saparynda dostyq, yntymaqtastyq pen ózara túsinistik týraly kelisimge qol qoıdy. Sodan beri Frantsııa men Qazaqstan arasyndaǵy áriptestik baılanystyń qarqyndy damyp kele jatqany ras», - dedi Martıne.

Jalpy, elshiniń Qazaqstanda turyp jatqanyna bir aı ǵana boldy. Osy aralyqta ol Almaty, Astana, Semeı óńirlerinde bolǵan.

«Semeıde Abaı Qunanbaev týraly, jalpy Alash eli týraly tanyp-bildim. Endi sizderdiń óńirlerińizge taban tirep jatyrmyz. Saparymyzdyń basty maqsaty -  bilim, mádenıet salasynda ózara yntymaqtastyq qarym-qatynas ornatý. Búginde Qazaqstan men Frantsııa arasynda saıası, iskerlik, ekonomıkalyq jáne mádenı salalarda erekshe ózara baılanys qalyptasty dep aıta alamyz. Frantsııa sapaly bilimimen, oqý baǵdarlamalarynyń ár alýandyǵymen erekshelenedi. Bizdiń eldi «Matematıkalyq derjava» dep te ataıdy. Aldaǵy ýaqytta Qazaqstandaǵy joǵary oqý oryndarymen tyǵyz baılanysta jumys istegimiz keledi», - dedi F.Martıne.