Qostanaıdyń joǵarǵy oqý oryndary polıtsııa kadrlaryn daıyndaıdy
QOSTANAI. QazAqparat – Qostanaı oblysynyń polıtsııa departamenti men 6 iri JOO arasynda ózara yntymaqtastyq týraly Memorandýmǵa qol qoıyldy, dep habarlaıdy QazAqparat polıtsııa departamenti baspasóz qyzmetine silteme jasap.
Polıtsııa departamenti bastyǵynyń orynbasary Ardaq Yntyqbaevtyń aıtýynsha, qujat oblystyń oqý oryndary men Іshki ister mınıstrligi arasyndaǵy ǵylymı yntymaqtastyqty rettemek.
«Polıtseı mamandyǵynyń bedeli jyldan jylǵa artyp keledi. Aǵymdaǵy jyldyń 1 shildesinen bastap patrýldik polıtsııa qyzmetkerleriniń jalaqysy 65% ósti. Sondaı-aq, turǵyn úıdi jalǵa alý úshin 20 myń teńgeden 50 myń teńgege deıin ótemaqy qarastyrylǵan. Sonymen qatar, polıtsııa qyzmetkerleri men olardyń otbasy múshelerine, quqyq qorǵaý organdarynyń ardagerlerine tegin medıtsınalyq qyzmet kórsetiledi», – dep atap ótti polıtsııa polkovnıgi.
Atalmysh memorandým «2019-2021 jyldarǵa arnalǵan ishki ister organdaryn jańǵyrtý jónindegi «Jol kartasyn» júzege asyrý sheńberinde iske asty. Ondaǵy basym baǵyttardyń biri – jurtshylyqpen tıimdi ózara is-qımyl, halyqpen jumystyń jańa formaty, quqyq qorǵaý organdarynyń kadrlaryn irikteý jáne daıarlaý.
«Biz memorandým aıasynda JOO-nyń stýdentterin jumysqa ornalastyrý jáne tájirıbeden ótý týraly naqty kelisimderge qol jetkizdik. Yntymaqtastyq sheńberinde oqý josparlaryn túzetip, jumys berýshiniń tilekterin eskeremiz. Jyl saıyn eki myńnan astam zańger daıarlaımyz jáne bul baǵyt eseptik mekemede asa talap etilgen», - dep atap ótti Chelıabi memlekettik ýnıversıtetiniń Qostanaı fılıaly dırektorynyń orynbasary Natalıa Nalızko.
Budan ári memorandýmnyń mindetterin iske asyrý úshin birlesken is-sharalar jospary jasalady.
