Qostanaıdyń «Úzdik pedagogy» anyqtaldy
QOSTANAI. QazAqparat - Qostanaı qalasyndaǵy «Mıras» mádenıet úıinde jyldyń úzdik pedagogtary marapattaldy, dep habarlady QazAqparat tilshisi.
Ustazdardy kásibı merekelerimen quttyqtaý úshin Qostanaı qalasynyń ákimi Bazyl Jaqypov keldi. Osy jyly shákirt tárbıeleýde erekshe kózge túsken 13 muǵalim qala ákiminiń qolynan alǵys hat aldy. Olarǵa maqtaý qaǵazdary men aqshalaı syılyqtar tapsyryldy.
Muǵalimder kúnine oraı ótkizilgen «Úzdik pedagog» baıqaýy da búgin qorytyndylandy. Jalpy, Qostanaıda 3 myńnan astam pedagog jumys isteıdi desek, solardyń arasynan qaladaǵy №2 mektep-lıtseıdiń muǵalimi Gúljahan Torına úzdik shyǵyp otyr. Onyń «Mektep oqýshylarynyń jetistikterin formatıvtik baǵalaý» taqyrybyndaǵy sheberlik-sabaǵy respýblıkalyq dárejede joǵary baǵalandy.
«Memleket tarapynan bilim salasyna aıyryqsha qoldaý kórsetilýde. Sondyqtan qazirgi tańdaǵy basty maqsat ta osy jaýapkershilik júgin kóterý bolsa kerek. Otanǵa degen súıispenshilikti, ulttyq qundylyqtardy bala boıyna sińirýde ustazdar eńbegi ólsheýsiz. Sol sebepti olarǵa degen qurmet báseńdemek emes. Búgingi baıqaý sonyń bir dáleli», - deıdi Gúljahan Torına.
Al Qostanaı oblysy ákiminiń alǵys hatymen «Ýlybka» balabaqshasynyń tárbıeshisi Irına Ponamareva men №10 mekteptiń muǵalimi Dına Alataeva marapattaldy.
Marına Jıgına, Bıbigúl Álimova syndy jyl úzdikteri «Sosnovyı bor» shıpajaıyna joldamaǵa ıe boldy.
