Qostanaıdyń úzdik pedagogtary marapattaldy
QOSTANAI. QazAqparat - Muǵalimder men bilim salasy qyzmetkerleriniń kásibı merekesi qarsańynda Qostanaıdaǵy «Mıras» mádenıet úıinde saltanatty is-shara ótti, dep habarlaıdy QazAqparat.
Merekelik jıynǵa oblystyń úzdik pedagogtary men osy salanyń ardagerleri shaqyryldy. Mádenıet úıine jınalǵan kópshilik ardager ustazdardy zor qoshemetpen qarsy alyp jatty. Oblys ákiminiń orynbasary Marat Júndibaev saltanatty sharaǵa qatysyp, mereke ıelerin quttyqtady. Artynsha mamandyǵynyń maıtalmany atanǵan ozyq oıly pedagogtardy «QR bilim berý isiniń úzdigi» jáne «Y.Altynsarın atyndaǵy tósbelgimen» marapattap, QR Bilim jáne ǵylym mınıstrliginiń gramotasyn, alǵys hatyn jáne oblys ákiminiń gramotasyn, «Ulaǵat» syılyǵyn tabystady.
«Uly aǵartýshy, jerlesimiz Ybyraı Altynsarın salǵan dara jol qazaq halqyn órkenıetke jeteledi. Onyń izin táýelsiz Qazaqstannyń ustazdar qaýymy abyroımen jalǵap keledi. Qazirgi tańda elimizde bilim berý salasyn jańǵyrtý, oqý mazmunyn jańartý jumystary keń aýqym aldy. Bilimniń sapasy, qoljetimdiligi jáne tıimdiligi osy salanyń negizgi basymdyqtary bolyp otyr»,-dedi M.Júndibaev.
Elimizde bilim berý salasyn jańǵyrtýǵa jyl saıyn erekshe kóńil bólinetini belgili. Kúni búgin Elbasy N.Nazarbaev jarııalaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda pedagogtardyń mártebesine mán berip, balabaqshadaǵy tárbıeshilerdiń jalaqysyn kóterýdi tapsyrǵan edi. Memleket basshysynyń tapsyrmasyna oraı kelesi jyly «Pedagog mártebesi týraly» zań ázirlenip, qabyldanatyn bolady.
