Qostanaıdyń temir rýda kontsentraty Qytaıǵa jóneltildi
QOSTANAI. QazAqparat - Sońǵy 5 jylda Qostanaıdan Qytaıǵa eksportqa 19 myń tonna temir rýdasynyń kontsentraty jiberildi. Bul týraly Lısakovsk qalasynyń ákimi Almat Ysmaǵulov turǵyndarǵa esep berý kezdesýinde aıtty, dep habarlaıdy QazAqparat.
Jalpy, byltyr Lısakovsk qalasynyń óndiristik kásiporyndary 38 mlrd teńgeniń ónimin óndirgen. Bul - sońǵy bes jyldaǵy eń joǵarǵy kórsetkish. Taý-ken óndirisi 30 mlrd teńgeniń ónimin shyǵardy. Atalǵan kórsetkish 2016 jylmen salystyrǵanda 5%-ǵa artyq. Boksıt óndirý de 3%-ǵa ósip, sońǵy úsh jylda jalpy kólemi 10%-ǵa artty. Degenmen, keı óndiris oshaqtarynyń kórsetkishteri kóńil kónshitpeıdi. Qala ákiminiń synyna ushyraǵan «Órken» JShS bar bolǵany 450 myń tonna temir rýdasyn óndirgen.
«Ázirge maqtanarlyǵy, seriktestik sońǵy bes jylda birinshi ret Qytaı naryǵyna 19 myń tonna temir rýdasy kontsentratyn shyǵardy. Basqa jaǵy báseńdep jatyr. Sony qolǵa alý kerek. Negizi, temir óndirý salasynyń damýyna ındýstrııaldy-ınnovatsııalyq baǵdarlama aıasynda júzege asqan jobalar aıtarlyqtaı úles qosty. Mysaly, «Lısbým», «KBK-2015», «Spetsstalkonstrýktsıı» kompanııalary óz ónimderinen 500 mln teńge paıda tapty», - dedi qala ákimi.
Lısakov ákiminiń sózinshe, 2018 jyly óńirde 660 tonna temir kontsentraty óndirilmek. Buǵan qosa qaladan shyǵa beristegi temir jol relsteri jańarady.
