Qostanaıdyń shalǵaı aýdandarynda bank fılıaldary joq
QR Ulttyq banki oblystyq fılıalynyń dırektory Jomart Qajyrahymovtyń málimetinshe, oblysta ekinshi deńgeıli 14 banktiń 81 fılıaly bar. Olardyń 47-si shaǵyn qalalar men aýdandarda.
«Búginde bizdi ońtústik óńirlerdiń jaǵdaıy alańdatyp otyr. Ásirese, Amankeldi, Jankeldın, Naýyrzym aýdandaryna bank fılıaldaryn ornalastyrý qajet. Altynsarın aýdany qalaǵa jaqyn ornalasqandyqtan, turǵyndar oblys ortalyǵyna kelip, qujattaryn rásimdeı alady. Osy tusta jergilikti ákimder kómektesse, shalǵaı aýdandarda bank bólimsheleri ashylar edi», - dep málimdedi Qajyrahymov.
Al oblystan tysqary aýdandarda turatyn kásipkerler nesıe rásimdeý úshin Qostanaıǵa birneshe márte kelip-ketedi. Bankter nesıeleýge birden kelisim bermeıdi. Osylaısha, eki arany jol qylǵan kásipkerler aqyry taýy shaǵylyp, jobalaryn jyly jaýyp qoıýǵa májbúr.
«Kásipkerlikti qoldaýda eshqandaı kedergi bolmaýy tıis. Halyq Banki sııaqty áleýetti bankterdiń fılıaldaryn ashyńyzdar. Bul rette ǵımarat bólý úshin ár aýdannyń ákimi kómektesedi. Aldaǵy jyldyń naýryz aıyna deıin jospar jasaý kerek. Muny orynbasarlaryma tapsyramyn»,-dedi keńeste oblys ákimi Arhımed Muhambetov.
