Qostanaıdyń Qarabalyq aýdanynda jarqanattar qaptap ketti
QOSTANAI. QazAqparat - Qostanaı oblysynyń Qarabalyq aýdanyna qarasty Fadeev aýylynda jarqanattar bir úıge kirip ketken, dep habarlaıdy QazAqparat.
Dál osyndaı jaǵdaı ótken aıdyń sońynda bolǵan. Fadeev turǵyny Danıl Shıpýlınniń aıtýynsha, ol kezde aýyldyń shetindegi buzylǵan úıge jarqanattyń 10-ǵa jýyq balapany ushyp kelgen.
«Іnim ekeýmiz sý alýǵa qudyq basyna ketkenbiz. Shamamen saǵat úshtiń mańaıy bolatyn. Jarty saǵat ótken soń úıge kelsem, tóbede shıqyldap, ary beri ushyp júrgen úsh jarqanatty baıqadym. Qorqyp ketkenimdi jasyrmaımyn. Syrtqa júgirip shyqtym. Іnimdi jazǵy úıge qaldyryp, sálden soń qolyma quryq alyp, ishke kirdim. Esikterdi ashyp qoıyp, olardy úrkittim. Bolmady. Aǵash jolatqan saıyn aıbat shegip, typyrshıdy. Ne kerek, qaqpaılap júrip, úlken qutyǵa kirgizdim. Al kesh batqan soń, jarqanattardy aýyl shetine aparyp, bosatyp jiberdik», - dep eske aldy Danıl.
Al sarapshy-zoologtardyń aıtýynsha, jarqanattar túnde óz jolynan adasyp ketken soń úıge kirip ketken. Olardan keler qaýip joq. Alaıda, úreı týǵyzatyndyqtan kishkentaı balalardy saqtandyrǵan jón. Mamandar ásirese, aýyldyq jerlerde esik, terezelerdi ashyq qaldyrmaýdy eskertedi.
