Qostanaıdyń halyqaralyq áýejaıy kommýnaldyq menshikke ótti

QOSTANAI. QazAqparat - Qostanaı halyqaralyq áýejaıy respýblıkalyq menshik tiziminen alynyp tastaldy, dep habarlaıdy QazAqparat tilshisi oblys ákimdigi qarjy basqarmasynyń basshysy Alma Júsipovaǵa silteme jasap.

Aıta keteıik, atalǵan nysan osy ýaqytqa deıin QR Investıtsııalar jáne damý mınıstrliginiń balansynda bolyp keldi. Eske salsaq, Qostanaı halyqaralyq áýejaıy jekeshelendirýdiń ekinshi kezeńi aıasynda taǵy da satylmaı qalǵan bolatyn.

Endi atalǵan nysan respýblıkalyq menshik tiziminen alynyp tastaldy.

«Osyǵan deıin áýejaıdyń ushý-qoný jolaǵy jeke múlik retinde kommýnaldyq menshikke berilgen edi. Qazirgi ýaqytta onda respýblıkalyq transfert esebinen jóndeý jumystary júrgizilip jatyr. Endi «Qostanaı halyqaralyq áýejaıy» aktsıonerlik qoǵamynyń 100 paıyz aktsııasy respýblıkalyq menshikten Qostanaı oblysynyń kommýnaldyq menshigine berildi. Bul protsess memlekettik zańnamada belgilengen tártippen júzege asty. Zań boıynsha, satylymǵa qoıylǵan nysan 3 ret ótpese, onda kommýnaldyq menshikke ótkizýge týra keledi», - dep túsindirdi Alma Júsipova agenttik tilshisine.

Úkimet qaýlysy bekitilgennen keıin áýejaıdyń jóndeý jumystaryna jumsalatyn qarjy oblys bıýdjetinen alynady. Biraq, Alma Júsipovanyń sózinshe, áýejaı AQ retinde paıda túsire alady. 

Aıta keteıik, halyqaralyq áýejaı Qostanaı qalasynan ońtústik-batysqa qaraı 2 shaqyrym jerde ornalasqan. Bir jyl ishindegi reıs sany - 1700. Jetkiziletin júk pen poshtanyń kólemi - 250 tonnadan astam.