Qostanaıdyń halyqaralyq áýejaıy ekinshi ret satylymǵa qoıyldy
QOSTANAI. QazAqparat - Qostanaı halyqaralyq áýejaıy jekeshelendirýdiń ekinshi kezeńi aıasynda taǵy da saýdaǵa qoıyldy, dep habarlaıdy «QazAqparat» HAA tilshisi.
Áýelde, halyqaralyq áýejaıdy satyp alý quqyǵy boıynsha senimdi basqarýǵa berý tenderin ótkizý 2017 jylǵy 20 jeltoqsanǵa josparlanǵan. Alaıda, ótinim túspegen soń tender ótkizilmedi. Áýe aılaǵynyń bastapqy baǵasy - 862,1 mln teńge. Kepildik jarnasy 129,3 mln teńgege teń.
Tenderdiń negizgi sharty boıynsha Qostanaı áýejaıy 4 jylda satyp alý quqyǵymen senimdi basqarýǵa beriledi. Sondaı-aq, áýejaıdy basqarýǵa kelgen tulǵa jolaýshylar termınalyn qaıta qurý jumystarymen jáne bir-eki jyl ishinde qaıta qurýdyń tehnıkalyq-ekonomıkalyq negizdemesin ázirleýi kerek.
Endi ekinshi satylym 2018 jyldyń 9 qańtary kúni ótedi. Aıta keteıik, atalǵan nysan Qazaqstan Respýblıkasy Investıtsııalar jáne damý mınıstrliginiń balansynda tur. Ol Qostanaı qalasy tóńireginiń ońtústik-batys jaǵynan 2 shaqyrym jerde jáne ákimshilik ortalyǵynan 5,6 shaqyrym qashyqtyqta ornalasqan. Áýejaı halyqaralyq mártebege ıe. Bir jyldaǵy reıs sany - 1700. Jetkiziletin júkterdiń, poshtanyń kólemi - 250 tonnadan astam.
