Qostanaıdyń eks-ákimi túrmeden merziminen buryn bosatýǵa taǵy ótinish bildirdi
QOSTANAI. QazAqparat - Qostanaıdyń burynǵy ákimi, qazir jazasyn ótep jatqan Ahmedbek Ahmetjanov shartty túrde merziminen buryn bosatýdy surap, ótinish túsirdi, dep habarlaıdy QazAqparat tilshisi oblystyq sottyń baspasóz qyzmetine silteme jasap.
«2018 jyldyń 20 jeltoqsany kúni Qostanaı qalasynyń №2 sotyna sottalǵan A.M. Ahmetjanov shartty túrde merziminen buryn bosatýdy surap, ótinish bildirdi. Sot otyrysy 2019 jylǵy 18 qańtar kúni 10:00-de «ÝK-161/11» mekemesinen onlaın-vıdeo rejıminde sot zalynda ótedi», - dep málim etti oblystyq sottan.
Eske sala keteıik, 2016 jyldyń 11 sáýirinde Qostanaı oblystyq qylmystyq ister jónindegi mamandandyrylǵan aýdanaralyq sotynyń úkimimen A. Ahmetjanov 13 jylǵa sottalyp, múlki tárkilendi. Sondaı-aq ol ómir boıyna memlekettik qyzmette laýazym ıelený quqyǵynan aıyrylǵan bolatyn.
Keıinnen QR Joǵarǵy sotynyń qylmystyq ister jónindegi sot alqasynyń 2017 jylǵy 20 shildedegi qaýlysymen bul úkim ózgertildi. Eks-ákimge 7 jyl 6 merzimge bas bostandyǵynan aıyrý, múlkin tárkileý, ómir boıyna memlekettik qyzmette laýazym ıelený quqyǵynan aıyrý jazasy belgilendi.
Sodan keıin Ahmetjanov Qazaqstan Respýblıkasy Táýelsizdiginiń jıyrma jyldyǵyna oraı raqymshylyqqa iligip, onyń ótelmegen 6 jyl 6 aı 10 kún túrindegi jazasy shırek bóligine qysqartylyp, qaýipsizdik deńgeıi ortasha mekemede óteletin 4 jyl 10 aı 23 kún etip belgilendi.
2018 jyly sáýir aıynda A. Ahmetjanov jazasyn ótep jatqan Shyǵys Qazaqstan oblysy Jarma aýdandyq sotynyń qaýlysymen qaýipsizdik deńgeıi barynsha tómendetilgen mekemege aýystyryldy. Artynsha, 18 maýsym kúni ol ShQO-daǵy mekemeden Qostanaı oblysyndaǵy qonystaný kolonııasyna jiberildi.
