Qostanaıdyń eks-ákimi men onyń orynbasarlary 14 mln teńge somasynda para aldy degen kúdik bar - Q. Qojamjarov
ASTANA. QazAqparat - Qostanaıdyń eks-ákimi men onyń orynbasarlary 14 mln teńge somasynda para aldy degen kúdik keltiriledi. Bul týraly búgin Májiliste Memlekettik qyzmet isteri jáne sybaılas jemqorlyqqa qarsy isqımyl agenttiginiń tóraaǵsy Qaırat Qojamjarov málim etti.
Agenttik basshysynyń aıtýyna qaraǵanda, Qostanaı qalasynyń ákimi men ony orynbasarlary, sondaı-aq turǵyn úı kommýnaldyq sharýashylyq bóliminiń basshysy sońǵy bir jarym aı barysynda qylmystyq jaýapkershilikke tartylyp keledi.
«Olar ózderiniń qyzmettik ókilettikterin asyra paıdalanǵan dep aıyptalýda, sonymen qatar, 300 myń teńgeden 14 mln. teńgege deıin para aldy degen kúdik bar. Búgingi tańda tergeý organdary mundaı qylmystyń qanshalyqty júıeli túrde júzege asyp otyrǵanyn tekserýde. Biz istiń tolyqqandy bolǵanyn jáne oǵan árbir jaýapty tulǵanyń qatysýyn qamtamasyz etýdi qalaımyz. Al Qostanaı oblysynyń burynǵy ákimi N. Sádýaqasovqa kelsek, ótinishter berildi, sheshim qabyldandy. Oǵan qatysty tergeý jańa bastaldy», - dedi Q. Qojamjarov. Esterińizge sala keteıik, Qostanaı qalasynyń ákimi Ahmedbek Ahmetjanov qyzmettik ókilettigin asyra paıdalandy degen kúdikpen 9 qyrkúıekte ustalǵan bolatyn. Keıinnen eks-ákim óz qylmysyn moıyndap, ol úıqamaqqa alynǵan bolatyn. Budan bólek, eks-ákimniń burynǵy orynbasarlary Frýnzık Arakelıan men Maqsut Qalıev te qamaýǵa alynǵan edi.
