Qostanaıdyń burynǵy ákiminiń áıeli tárkilengen kottedjdi qaıtaryp aldy
QOSTANAI. QazAqparat - Sybaılas jemqorlyq úshin sottalǵan Qostanaıdyń burynǵy ákimi Ahmetbek Ahmetjanovtyń áıeli Joǵarǵy sotta sheneýniktiń otbasy turǵan úıdi tárkileýden aman alyp qaldy, dep habarlaıdy QazAqparat tilshisi.
Baǵlan Ahmetjanovanyń shaǵymyn qaraý barysynda QR Joǵarǵy soty kottedjdi tárkileýdi boldyrmaý týraly sheshim qabyldady. Onymen birge ózge sottalýshylardyń shaǵymdary men úkiminiń «jeńil» ekenin aıtyp, keı tustarymen kelispegen Bas prokýratýranyń narazylyǵy qaraldy.
Quzyrly organnyń narazylyǵy qanaǵattandyrylǵan joq. Zańger Anna Kakırovanyń túsindirýinshe, talasqa túsken múlik qylmys jasalǵan ýaqytta sottalýshynyń ıeliginde bolmaǵan.
Al, zań qylmystyq jolmen tabylǵan múlikti ǵana tárkileýge jatady. «Al osy joly is júzinde ákesiniń qylmysy úshin qyzy jazalanǵan»,-dep túsindirdi Kakırova.
Osyndaı jolmen Qostanaı qalalyq ákimdigindegi para alý isi boıynsha sottalǵan basqa qylmysker - bıznesmen Leonıd Vasılevtiń qyzynyń páteri qaıtaryp berildi. Alaıda tárkilengen dúnıeniń negizgi bóligi saýdaǵa qoıyldy. Sottalýshylar múlikteriniń baǵasy jartylaı arzandatylsa da, satyp alýshylar tabylmaı jatyr.
Ázirge, Ahmetjanovqa tıesili Qostanaıdaǵy meıramhananyń jaǵdaıy belgili boldy. Onyń jalpy quny 400 mln teńdegen asady. Meıramhananyń ǵımaratyna memlekettik tórt mekeme - BJZQ, jer kadastrynyń ǴÓO, TIB jáne jer qatynastary bólimi ornalastyryldy.
