Qostanaıdyń bas josparyna ózgerister engiziledi
QOSTANAI. QazAqparat - Qostanaı qalasynyń bas josparyna ózeris engizilmek. Bul týraly oblys ákimi Arhımed Muhambetovtiń qatysýymen ótken jıynda málim etildi, dep habarlaıdy QazAqparat tilshisi.
Májiliste qalanyń bas jospary talqylandy. Shahar basshysy Bazyl Jaqypovtyń aıtýynsha, aldaǵy ýaqytta bas josparǵa edáýir ózgerister engiziledi. Qala ákimi Qostanaıdyń damý qarqyny jaıynda jáne alda atqarylatyn birqatar ıdeıalarymen bólisti.
«Qala aýmaǵynda turǵyn úı qurylysyna bólingen jerler jetkiliksiz. Biz 2009 jyldyń 3 qarashasynda Úkimet bekitken jospardy tolyqtaı oryndadyq. Qala qanat jaıa tússin desek, búgingi bas josparǵa túzetýler engizý qajet. Ózgerister jasaý úshin shamamen 1 mlrd teńge jumsalady. Jańa jobany Rýdnyı qalasyna qaraı, ıaǵnı soltústik-batys aýmaqqa yńǵaılastyryp jasaýdy jón sanaımyz», - dedi qala ákimi.
Bas josparǵa sáıkes, qurylys aımaǵy 95 gektarǵa jýyqtaıdy. Arhımed Muhambetov bul bastamany qoldap otyr. Degenmen, qurylysshylarǵa eskertý jasady. «Bolashaqta turǵyn úılerdiń bárin birdeı qyzyl kirpishten emes, basqa da túrlerin salý kerek», deıdi óńir basshy.
