Qostanaıdyń bas sanıtarlyq dárigeri: Epıdemıologııalyq ahýal nashar

QOSTANAI. QazAqparat – Qostanaı oblysynda kún saıyn koronavırýs ınfektsııasyn juqtyrǵandar sany artýda. Óńirdegi epıdemıologııalyq ahýal týraly brıfıngte oblystyń Bas sanıtarlyq dárigeri Ermuhanbet Dáýletbaev aqparat berdi, dep habarlaıdy QazAqparat tilshisi.

«Qostanaı oblysyndaǵy epıdemıologııalyq ahýal nashar. 2021 jyldyń 11 shildesinen bastap oblys «qyzyl» aımaqqa kirdi. Sońǵy alty kúnde ınfektsııa juqtyrǵandardyń sany edáýir ósken – táýligine 53-den 116 jaǵdaıǵa deıin tirkelip otyr. Sońǵy jeti kúndegi ósý qarqyny – 0,65%», - dedi ol. – Sońǵy aptanyń ózinde 639 jańa jaǵdaı tirkeldi. Juqtyrǵandardyń 17,9%-y ınfektsııa anyqtalǵan naýqastarmen baılanysta bolǵan, 5,1%-ynan vırýs kásibı tekserý kezinde anyqtalǵan, 76,8% naýqas aýrýhanaǵa óz betinshe qaralǵan.

Koronavırýs juqtyrǵandardyń kóbi – oblys ortalyǵynyń turǵyndary. Qostanaıda barlyǵy KVI-dyń 8 641 jaǵdaıy tirkelgen, bul – jalpy oblys boıynsha aýyrǵandardyń 48,33%-y.

Densaýlyq saqtaý basqarmasy jetekshisiniń orynbasary Anjela Beksultanova bergen aqparat boıynsha, 22 statsıonarda 1 302 tósek daıyndalǵan. Onda 575 naýqas em alýda. Júkteme 44%-dy qurap tur.

«Statsıonarlarǵa jatqan naýqastardyń sany ósýde. Jansaqtaý bóliminde 34 naýqas jatyr, 22 naýqastyń jaǵdaıy aýyr. Jas sanaty boıynsha, negizgi kontıngent – 60-70 jas aralyǵyndaǵy naýqastar. Іlespe aýrýlarǵa baılanysty olardyń aýrýy progressıvti júrýde», - dep túsindirdi A. Beksultanova.

Koronavırýs juqtyrý jaǵdaılarynyń ósýine baılanysty óńirde halyqty vaktsınalaý belsendi júrgizilýde. Ekpeni 30 medıtsınalyq uıymda alýǵa bolady. A. Beksultanovanyń aıtýynsha, búgingi kúni halyqtyń 217 myńy vaktsınanyń birinshi komponentin alǵan, ekinshi komponentti alǵandar sany 109 myńnan asady.

Dárigerler turǵyndardy maska taǵý, áleýmettik araqashyqtyq, jeke gıgıena, sonymen qatar vaktsınalaý syndy aldyn alý sharalaryn qatań saqtaýdy suraıdy.