Qostanaıdyń bas polıtseıi turǵyndarmen ashyq dıalog ótkizdi
QOSTANAI. QazAqparat – Qostanaı oblysy polıtsııa departamentiniń bastyǵy Beket Aımaǵambetov Zatobol kentinde azamattardy qabyldady, dep habarlaıdy QazAqparat.
Jeke qabyldaý barysynda Departament bastyǵy turǵyndardyń máselelerin tyńdap, olardy birden sheshýge kómektesti. Qabyldaýǵa marshrýttyq avtobýstardyń ókili Vladımır Ignatovıch keldi. Aıtýynsha, jańa jol júrý erejeleriniń 12.4.7 tarmaǵyna sáıkes taksı júrgizýshilerine avtobýs aıaldamasynyń aýmaǵyna kirýge tyıym salynǵan, alaıda olar jolaýshylardy únemi osy aıaldamalardan mingizip alyp ketedi.
«Másele únemi baqylaýda. Búgingi kúni 56 júrgizýshi ákimshilik jaýapkershilikke tartyldy»,-dep atap ótti Qostanaı aýdany polıtsııa bóliminiń bastyǵy Muhtar Jaılaýbekov.
Degenmen, departament bastyǵynyń tapsyrmasymen aldaǵy ýaqytta Jergilikti polıtsııa qyzmeti osy máseleni sheshý úshin reıdtik is-sharalardy ótkizetin bolady.
Kezdesý barysynda baǵdarshamdar máselesi de kóterildi. Jergilikti turǵynnyń sózinshe, Zatobolda 10 jol qıylysynda baǵdarshamdar jol baǵytynyń bir jaǵynan ǵana ornatylǵan.
«Tájirıbeli júrgizýshiler úshin bul jaǵdaı problema emes, biraq maǵan dál osy qıylystarda apattyq jaǵdaı kóp tirkeletinin aıtyp, áıel kisi keldi. Bul másele de sheshimin tabady deýge bolady. Óıtkeni, biz TKSh-ǵa usynys engizdik, endi eki baǵdarsham ornatylmaq. Qalǵan segizi jaqyn arada qoıylady», - dep atap ótti general.
Zatobol kentiniń turǵyny Gúlsara Álmaǵambetova jeke problemasymen júgindi. Onyń kúıeýi baqtashy bolyp jumys isteıdi. Ol tabyndy tas joldyń arǵy jaq betine ótkizý kezinde bir sıyrdy avtokólik qaǵyp ketken, tıisinshe kólik ıesi zalaldy óteýdi baqtashydan talap etip otyr.
«Júrgizýshi Altynsarın aýdanynyń polıtsııa bólimine júgingen. Іs-materıaldary tekserildi jáne taraptardyń jaýapkershiligi týraly másele sheshiletin bolady. Aýyl turǵyndary úshin mal shyǵyny – árdaıym úlken másele. Іri qara urlyǵy nemese joǵalýy jedel áreket etetin sharalar. Jyl basynan beri polıtsııa qyzmetkerleri 50-den astam mal urlyǵyn ashty», - dep atap ótti B. Aımaǵambetov.
Qabyldaý barysynda jergilikti JShS-degi kúzet qyzmetiniń bastyǵy Evgenıı Radıýk polıtsııaǵa kómektesken zor eńbegi úshin gramotamen marapattaldy. Ol aǵymdaǵy jyldyń 11 shildesinde Qostanaı aýdanynyń Altyn dala kentinde kisi óltirgen qylmyskerdi ustaýǵa kómektesti.
