Qostanaıdyń bas polıtseıi avtobýstardy tekserdi
Oblystyń bas polıtseıi Rýdnyı qalasyna sapary barysynda jergilikti polıtsııanyń front-keńsesinde azamattardy jeke qabyldap, «Qostanaı avtovokzaly» iri avtokásiporynyna bardy. Bul kásiporynda 200 júrgizýshi jumys isteıdi. Olar tek oblys ishinde ǵana emes, sonymen qatar odan tys jerlerge de tasymaldaıdy. Kásiporyn basshysy Botagóz Bopataevanyń sózinshe,zańsyz tasymaldaýshylar men tehnıkalyq tekserý sapasyna baılanysty máseleler sheshimin tappaı tur.
«Bizde 200 avtobýs bar. Ótken jyly qoǵamdyq kólikti tehnıkalyq tekserý úshin sapaly jabdyqtar satyp alyndy. Bizde kez kelgen kólik tehnıkalyq baıqaýdan óte alady. Biraq búginderi osyndaı qyzmetti eshqandaı tekseristen ótkizbeı, «vatsap» arqyly satatyndar paıda boldy. Kóptegen adamdar lıtsenzııa alady, avtobýstyń qaı jerge baratynyn aıtpaǵanda, qajetti jabdyqtary joq. Bul rette tehnıkalyq baıqaýdan ótkendigi týraly talon beriledi», - dedi B.Bopataeva.
Kásiporyn basshysynyń bul sózin kezdesýge kelgen júrgizýshiler qoldady. B.Aımaǵambetov kásiporynda jasalǵan jaǵdaılardy qarap shyǵyp, shyn máninde munda kólikti tekserý shuńqyrlary, arnaıy jabdyqtar bar ekenine kóz jetkizdi.
«Eger qoǵamdyq kólikter osyndaı tehnıkalyq baıqaýdan ótse, kóptegen másele sheshiler edi. Máselen, búgin elimizde birneshe iri jol-kólik oqıǵasy oryn aldy. Biz kóliktik baqylaý ókilderimen birlese otyryp, barlyq júrgizýshiler kóliktiń tehnıkalyq jaǵdaıyn sapaly tekserýden ótý tetikteri týraly máseleni pysyqtap jatyrmyz», - dep atap ótti general.
Departament basshysymen ótken kezdesýde júrgizýshiler taǵy bir problemany kóterdi. Bul – zańsyz tasymaldaýshylar. 46 jyl avtobýs tizgininde kele jatqan Vladımır Býblık tasymaldaýmen aınalysatyn taksı júrgizýshileri, sondaı-aq avtobýs júrgizýshileri jylyna eki ret tehnıkalyq baıqaýdan ótýge mindetti ekenin atap ótti. 6 qazanda Qostanaıda taksı kóligi janyp, júrgizýshi zardap shekti. Kóbinese, taksıler aqshany oılap, qaýipsizdikti esten shyǵarady deıdi ol.
«Biz taksı júrgizýshilerdiń avtovokzalǵa kirip, jolaýshylardy jınaıtynyn kórip júrmiz. Qazirdiń ózinde Qashar kentine baratyn avtobýsty toqtattyq, óıtkeni paıda joq. Sonymen qatar bizdiń avtobýstarǵa únemi tehnıkalyq baqylaý júrgiziledi», - dedi ol.
Beket Aımaǵambetovtiń aıtýynsha, bul másele burynnan bar.
«Men Qostanaı aýdanynda azamattardy qabyldadym, sol jerde tasymaldaýshylar maǵan shaǵymdanyp, narazylyq bildirdi. Jergilikti polıtsııa qyzmeti atalǵan máselelerdi tekserý úshin reıdter ótkizýde», - dep atap ótti general.
Oblysta «Avtobýs» jedel aldyn alý is-sharalarynyń birinshi kúni avtobýs júrgizýshileriniń 97 ret tártip buzǵan, onyń ishinde kóliktiń tehnıkalyq jaǵdaıyna baılanysty 6 zańbuzýshylyq tirkelgen.
