Qostanaıdyń 97 eldi mekenin sý shaıyp ketýi múmkin
QOSTANAI. QazAqparat - Qostanaıda kóktemgi tasqyn kezinde 97 eldi mekendi sý shaıyp ketýi yqtımal, dep habarlaıdy «QazAqparat» HAA tilshisi.
Óńirlik tótenshe jaǵdaılar departamentiniń bastyǵy Talǵat Kákimov aıtqandaı, oblysta tasqynǵa qarsy tosqaýyl jumystarynyń jospary jasalyp, tıisti organdarǵa tapsyrmalar berildi.
«Byltyr Qostanaı oblysynda 58 eldi meken sý basý qaýpi bar aımaqtar sanatyna kirse, bıyl bul kórsetkish 97-ge jetti. Atalǵan aýmaqtardy qatań baqylaýǵa aldyq. Jalpy, 40 eldi mekendi qar sýy shaıyp ketýi yqtımal. Al qalǵan 57 aýylǵa ózen-kólderdiń tasýy áser etedi dep boljandy. Qaýipti mekenderde 8000-nan astam turǵyn tirkelgen»,- dedi Talǵat Kákimov.
Qazir qutqarýshylar qalalyq ákimdiktiń qyzmetkerlerimen birlese otyryp, úılerdi jaǵalap, jaǵdaıdy baqylaýda ustap otyr. Sonymen qatar tótenshe oqıǵalardyń aldyn alý sharalary pysyqtalýda. Buǵan oblystyq bıýdjetten 452 mln teńge bólindi.
«Tótenshe jaǵdaı bola qalǵan jaǵdaıda, birinshi kezekte qutqarylatyn adamdardyń tizimin jasap jatyrmyz. Búginde bizdiń qyzmetkerler 15 aýylǵa baryp, 97 aıaǵy aýyr áıeldi esepke aldy. Sondaı-aq, arnaıy tizimde 30 bala bar. Naýryz aıynyń basyna deıin barlyq eldi mekendi aralap shyǵamyz», - dep túsindirdi departament basshysy.
Aıta ketý kerek, sý tasqyny kezinde úı janýarlary qaýipsiz aımaqqa kóshiriledi. Departament deregine súıensek, óńirde janýarlardy evakýatsııalaıtyn 152 oryn daıyn tur.
«4-5 naýryzda Qostanaıda respýblıkalyq oqý-jattyǵý jıyndary ótedi. Qyzmetkerler men jurttyń daıyndyǵy sol kezde taǵy bir pysyqtalatyn bolady», - deıdi Talǵat Kákimov.
