Qostanaıdyń jańajyldyq bezendirilýine qansha qarjy bólindi
ASTANA. KAZINFORM — Qostanaıda 2027 jylǵy Jańa jyl meıramyna daıyndyq bastaldy. Qalada bes shyrsha ornatylyp, muz aıdyndary, syrǵanaqtar men merekelik kompozıtsııalar jasalady.
Qala ákimdiginiń málimetinshe, bıiktigi 23 metr bolatyn bas shyrsha oblys ákimdigi ǵımaratynyń aldyndaǵy alańǵa ornatylady. Taǵy bir úlken shyrsha Jastar saraıynyń janynda, «ıÝbıleınyı» shaǵyn aýdanynda boı kóteredi. Onyń bıiktigi — 22 metr. Qalǵan úsh shyrshanyń bıiktigi 11 metr bolady. Olar KSK shaǵyn aýdanyndaǵy «Jastar» býlvaryna, «Aeroport» shaǵyn aýdanyndaǵy «Kerýen» saıabaǵyna jáne «Qonaı» turǵyn alabyna qoıylady.
Muz qalashyǵyn salý úshin «QazGranStroı» JShS-men 98,6 mln teńgege kelisimshart jasalǵan. Bul somaǵa merekelik nysandardy salý men bezendirý ǵana emes, olardy kútip ustaý, sondaı-aq 2027 jylǵy naýryzǵa deıin bólshektep, qurylymdaryn alyp ketý jumystary da kiredi.
Negizgi muz qalashyǵy Qostanaıdyń ortalyq alańynda ornalasady. Munda Aıaz ata, Aqshaqar jáne kele jatqan jyldyń sımvoly beınelengen músinder qoıylady. Kelýshiler úshin úlken jáne ortasha muz syrǵanaqtary men labırınt jasalady. Budan bólek, «2027» sandary beınelengen sándik qurylym jańartylyp, qaıta ornatylady. Sondaı-aq qaladaǵy alty sýburqaq kórkem bezendiriledi.
Jastar saraıynyń aldyndaǵy alańda aǵash qorshaýy bar muz aıdyny jasalyp, ortasha muz syrǵanaǵy salynady. Munda da jyl sımvoly men «2027» merekelik kompozıtsııasy ornatylady.
Jastar býlvarynda muz qorshaýy bar syrǵanaq pen muz aıdyny paıda bolady. Al «Qonaı» turǵyn alabynda taǵy bir ortasha muz syrǵanaǵyn salý josparlanǵan.
Eske salaıyq, buǵan deıin Almatyda jańajyldyq bezendirýge qansha qarajat jumsalatyny jóninde jazǵanbyz.
