Qostanaıdyń perınataldyq ortalyǵyndaǵylar ystyq sýdyń joqtyǵyna shaǵymdandy

Áleýmettik jelide bosanǵan áıelder qaladaǵy josparly óshirý kezinde medıtsınalyq mekemede qıyndyqtar týyndaǵanyn jazǵan. 

Patsıentterdiń biri bosanǵannan keıin áıelderdiń ne ózderi, ne sábılerin durys jýyndyra almaı otyrǵanyn aıtqan.

Pikir qaldyrǵan basqa qoldanýshylar da mundaı jaǵdaı alǵash ret emes ekenin jazdy.

Qostanaı oblystyq densaýlyq saqtaý basqarmasy jaǵdaıǵa baılanysty túsinikteme berdi.

Mekeme málimetinshe, ystyq sý josparly túrde toqtatylǵan kezeńde ortalyqta rezervtik sý jylytqyshtary paıdalanylady.

— Qazir perınataldyq ortalyqta 18 rezervtik sý jylytqyshy jumys isteıdi. Olar bosaný zaldaryna, bosanǵannan keıingi bólimderge, gınekologııaǵa, operatsııalyq blokqa, jansaqtaý jáne jańa týǵan náresteler patologııasy bólimderine ornatylǵan, — dep habarlady mekeme ókilderi.

Degenmen ár palataǵa sý jylytqysh qoıý tehnıkalyq turǵyda múmkin emes ekeni aıtyldy.

Medıtsına mekemesi ókilderiniń túsindirýinshe, ǵımarattaǵy elektr jelisiniń qýaty shekteýli.

Saldarynan jelige artyq kúsh tússe, elektr energııasy óship, medıtsınalyq qurylǵylardyń jumysy buzylýy múmkin.

Bul ásirese operatsııalyq bólimder men jańa týǵan sábılerdiń jansaqtaý bóliminiń jumysyna qaýip tóndiredi.

Osyǵan deıin 2026 jyldyń naýryz aıynda Qostanaı oblysy Meńdiqara aýdanyndaǵy Ǵabbas Jumabaev atyndaǵy mektep-gımnazııada týberkýlez deregi tirkelgeni týraly jazdyq.