Qostanaıdyń Lısakovsk qalasynda balalardyń oıyn aımaǵy órtendi
ASTANA. KAZINFORM — Lısakovsk qalasynda qutqarýshylar balalar oıyn aımaǵynda shyqqan órtti sóndirdi, dep habarlaıdy Kazinform agenttiginiń tilshisi.
Oqıǵa ornynan túsirilgen kadrlar áleýmettik jelilerde tarady.
Qutqarýshylardyń málimetinshe, Lısakovsk qalalyq saıabaǵyndaǵy ashyq aýmaqta batýt pen eki oıyn konstrýktsııasy órtengen.
Tótenshe jaǵdaılar departamentiniń deregine sáıkes, órttiń jalpy aýmaǵy 45 sharshy metrdi qurady. Oqıǵa ornyna qutqarý qyzmetteriniń kúshteri men tehnıkasy jumyldyryldy.
Órt tolyqtaı sóndirildi. Zardap shekkender joq.
Eske salaıyq, buǵan deıin Arqalyq qalasyndaǵy №5 orta mekteptiń tórt qabatty ǵımaratynyń shatyry órtengen bolatyn.
Keıin óńirlik bilim basqarmasy órttiń aldyn ala sebebi dánekerleý jumystary bolýy múmkin ekenin habarlady.
