Qostanaıdan Tashkentke tikeleı áýe reısi ashylady
ASTANA. KAZINFORM — 13 maýsym kúni Ahmet Baıtursynuly atyndaǵy halyqaralyq áýejaıy Ózbekstannyń Centrum Air áýe kompanııasynyń Qostanaı-Tashkent-Qostanaı baǵyty boıynsha alǵashqy turaqty reısin qarsy alady.
Jańa halyqaralyq baǵyttyń ashylýy Qazaqstan men Ózbekstan arasyndaǵy áýe qatynasyn damytýdaǵy kezekti mańyzdy qadam bolmaq.
Jańa reıs eki el arasyndaǵy iskerlik, týrıstik jáne mádenı baılanystardy nyǵaıtyp, Qostanaı oblysy turǵyndary úshin kólik qoljetimdiligin arttyrady dep josparlanǵan.
Ahmet Baıtursynuly atyndaǵy halyqaralyq áýejaı basqarma tóraǵasy Asqar Bekbosynovnyń aıtýynsha, Tashkent baǵyty boıynsha reısterdiń iske qosylýy áýejaı men óńir úshin mańyzdy oqıǵa bolady.
— Jańa baǵyt Qazaqstan men Ózbekstan arasyndaǵy iskerlik, týrıstik jáne mádenı baılanystardy damytýǵa qosymsha múmkindik beredi. Sonymen qatar, ol Qostanaı oblysynyń kólik qoljetimdiligin arttyryp, áýejaıdyń halyqaralyq baǵyttar jelisin keńeıtedi, — dedi Asqar Bekbosynov.
Aıta keteıik, 2 maýsymnan bastap Air Astana áýekompanııasy Astana — Larnaka baǵyty boıynsha tikeleı reısterdi iske qosty.
