Qostanaıdan Nıý-Iorkke 24 tonna qazaqstandyq un eksporttaldy
ASTANA. KAZINFORM – Qostanaıdan Nıý-Iorkke deıin Transkaspıı halyqaralyq kólik baǵyty arqyly 24 tonna qazaqstandyq un jóneltildi, dep habarlaıdy QR Aýyl sharýashylyǵy mınıstrligi.
Jóneltilimdi KTZ Express kompanııasy uıymdastyrdy. Júk 2026 jylǵy 10 naýryzda jolǵa shyqqan. Eksporttalǵan ónimdi Qazaqstandaǵy iri un tartý kásiporyndarynyń biri sanalatyn Salamat Company LLP óndirgen.
Mınıstrlik málimetinshe, qazaqstandyq unǵa halyqaralyq naryqta suranys artyp keledi. Bul sheteldik seriktesterdiń otandyq ónimge turaqty qyzyǵýshylyq tanytyp otyrǵanyn kórsetedi.
Tasymal mýltımodaldy konteınerlik formatta, ıaǵnı temirjol men teńiz kóligin kezektestire paıdalaný arqyly júzege asyrylýda. Alǵashqy kezeńde júk konteınerge tıelip, Qostanaıdan Aqtaý portyna jetkizildi. Odan keıin Kaspıı teńizi arqyly Ázerbaıjannyń Alat portyna tasymaldanyp, ári qaraı Grýzııanyń Potı portyna jóneltildi.
Keıin júk Qara teńiz arqyly ótip, Ystambul baǵytymen Jerorta teńizine shyqty. Sońǵy kezeńde júk Atlant muhıty arqyly tasymaldanyp, Nıý-Iork portyna jetkiziledi.
Teńiz arqyly tasymaldaý álemdegi iri keme qatynasy kompanııalarynyń biri — CMA CGM seriktestigimen júzege asyrylyp jatyr. Jalpy tranzıt ýaqyty shamamen 58 kúndi quraıdy.
KTZ Express kompanııasynyń málimetinshe, júk jóneltilgen sátten bastap sońǵy jetkizý núktesine deıin tolyq baqylaýda bolady. Bul logıstıkalyq tizbektiń senimdiligin jáne jańa naryqtarǵa shyǵý baǵyttarynyń tıimdi ekenin kórsetedi.
Aıta keteıik, Qazaqstanǵa efıopııalyq kofe eksporttalýy múmkin.
