Qostanaıdaǵy jańa attraktsıonda 9 jasar qyz aýyr jaraqattandy
QOSTANAI. QazAqparat - Qostanaı Ortalyq saıabaǵyndaǵy jańa attraktsıonda oınaǵan 9 jastaǵy Vıoletta Korjen aýyr jaraqat aldy. Qyzdyń áke-sheshesi osy jaıt boıynsha sottaspaq, dep habarlaıdy QazAqparat tilshisi.
Qyzdyń sheshesi E. Kadyntsevanyń aıtýynsha, olar 22 shilde kúni balalaryn oınatýǵa barǵan. Jańa attraktsıonda oınap júrgen 8-10 jastaǵy balalardy kórgen Vıoletta men nemere aǵasy da olarǵa qosylǵysy keledi.
«Ol jerde kishkentaı balalar da bar edi. Biz bılet alyp, balalardy kirgizdik. Artynsha kirgen eresek bozbalalar esirip, qutyra bastady. Olardyń biri Vıolettanyń ústine qulap tústi. Sosyn ol qolyn kóterip, attraktsıondy toqtatýdy surady. Vıoletta shyqqan soń, olar oıyn-saýyǵyn jalǵastyrdy», - deıdi E. Kadyntseva.
Qorqyp qalǵan qyz jaraqattanǵanyn sezbegen, sondyqtan olar úıge kete barǵan.
«Erteńine tańerteń aýrýhanaǵa bardyq. Óıtkeni qyz ornynan tura almaı qaldy, tipti tamaq ta jegen joq. Sóıtsek, buǵana súıegi ornynan qozǵalyp, synyp ketken eken. Endi bir aı gıpste júrýine týra keledi. Dárigerler ota jasap, arnaıy shabaq (spıtsa) ornatty. Eki aıdan keıin ekinshi ret ota jasap, shabaqty alyp tastaıdy. Attraktsıonda qaýipsizdik erejesi de, neshe jasqa deıingi balalardyń oınaýy múmkin ekendigi - eshteńe jazylmaǵanyna yzalanyp otyrmyz», - deıdi áıel.
Aıtýynsha, bul jaǵdaı Vıolettanyń sabaq úlgerimine keri áserin tıgizedi.
«Ol bıge qatysady, endi ol da qaldy. Túrkııaǵa barmaqshy edik, bıletimiz qolymyzda boldy. Demalystan bas tartýǵa týra keldi», - deıdi ol.
Elena Kadyntseva osy ispen advokat aınalysyp jatqanyn jetkizdi, saıabaq ákimshiligine qatysty qylmystyq is qozǵalǵan.
Qylmystyq is qozǵalǵany týraly park basshylyǵy BAQ arqyly jáne jábirlenýshi taraptyń advokatynan bilgen. Atqarýshy dırektor Amangeldi Dosjanov munymen kelispeı, sottasýǵa ázir ekenin aıtty.
«Bizge jábirlenýshi tarapynan tikeleı shaǵym da, quqyq qorǵaý organdary tarapynan shaqyrý da kelgen joq. Olar máseleni sol jerde-aq sheshýine bolar edi. Polıtsııa ýchaskesi sol mańda, jedel járdem shaqyrýy múmkin edi. Al olar úıine ketip qalǵan. Aýrýhanaǵa erteńine baryp, qyzdyń jaraqaty sol jerde belgili bolǵan», - deıdi park dırektory.
Saıabaq dırektory eger is sotqa deıin barsa, park basshylyǵy óz quqyqtaryn qorǵaýǵa ázir ekenin jetkizdi. «Bizdiń basqa amalymyz joq», - deıdi A. Dosjanov.
