Qostanaıdaǵy vırýsologııalyq ortalyq zamanaýı qurylǵylarmen qamtyldy
QOSTANAI. QazAqparat – Ulttyq saraptama ortalyǵynyń oblastyq fılıalyna qaraıtyn vırýsologııalyq zerthana jańa qurylǵylarmen qamtyldy, dep habarlaıdy QazAqparat oblys ákimdigi janynan qurylǵan jedel Shtabqa silteme jasap.
Ulttyq saraptama ortalyǵy fılıalynyń vırýsologııalyq zerthanasy koronavırýs indetiniń synamalaryn tekserýdi osy jyldyń naýryz aıynan bastady. Osy ýaqyt aralyǵynda munda shamamen 56800 taldaý júrgizildi. Búginde 5 maman CVI dıagnostıkasymen aınalysady. Jedel shtabtyń sheshimimen vırýsologııalyq zerthanaǵa qomaqty qarjy bólindi.
«28 mıllıon teńge qosymsha jabdyqtar satyp alýǵa, al 14 mıllıon teńge shyǵyn materıaldaryna jumsalady. Jańa qurylǵylar zerthanada synama tekserýdiń qýattylyǵyn arttyryp, sapasyn jaqsartady. Zerthananyń qýattylyǵy joǵary, munda kúnine 850 zertteý sharasy ótedi. Іndettiń jappaı taralýyna baılanysty kún saıyn 900-den 1300-ge deıin synama túsedi. Bul shamadan tys júkteme tekseris nátıjelerin de keshiktirýde. Osyǵan oraı, jedel shtabtyń sheshimimen qosymsha zamanaýı jabdyqtar satyp alýǵa qarjy bólinip otyr. Jańa jabdyqtardyń arqasynda zertteý ýaqyty da qysqarady. Eger buǵan deıin bir synamany tekserýge bir jarym-úsh saǵatqa deıin ýaqyt ketse, endi 15-20 mınýtty quraıdy», delingen Shtab aqparatynda.
Óńirde koronavırýs ınfektsııasynyń dıagnostıkasy 5 zerthana bazasynda júrgiziledi. Olar: «Ulttyq saraptama ortalyǵy» sharýashylyq júrgizý quqyǵyndaǵy respýblıkalyq memlekettik kásiporny fılıalynyń zerthanalary, «Olımp» klınıkalyq-dıagnostıkalyq ortalyǵy jáne Ahmet Baıtursynov atyndaǵy Qostanaı memlekettik ýnıversıteti bazasyndaǵy zerthana. Bul nysandarda kúnine 2000-2500 synama alynady.
