Qostanaıdaǵy túngi klýb órti kezinde TJ qyzmetkeri zardap shekti
QOSTANAI. QazAqparat - Qostanaı oblysy TJD órt sóndirý jáne apattyq-qutqarý jumystary bólimi bastyǵynyń orynbasary Erbolat Aqdáýletov "WEST" kóńil-kóterý kesheninde bolǵan órtke qatysty resmı málimdeme jasady, dep habarlaıdy QazAqparat.
«10 qyrkúıek kúni saǵat 9-da órt sóndirý qyzmetiniń kezekshi bólimi Táýelsizdik kóshesiniń boıynda ornalasqan "WEST" klýbynyń órtengeni týraly habar aldy. Bastapqyda ǵımarattyń shatyry órtenip, jalyn ekinshi qabatqa tıgen. Shatyrǵa tez tutanatyn materıal tóselgendikten órt jyldam taraldy. Táýelsizdik kóshesiniń boıyndaǵy jol jóndelip jatqandyqtan, arnaıy órt sóndirgish tehnıkalardyń ǵımarat mańyna jaqyndaýy qıyndyq týǵyzdy. Órt sóndirýshilerge nysannyń toqtan tolyqtaı ajyratylǵany aıtylǵan. Alaıda, bizdiń bir qyzmetkerdi elektr togy uryp, aýrýhanaǵa tústi. Qazir onyń jaǵdaıy jaqsy. Al órttiń naqty neden bolǵanyn bizdiń zerthana mamandary anyqtap jatyr», - dedi Erbolat Aqdáýletov.
Órt kólemi shamamen 450 sharshy metrdi quraıdy. Órt oshaǵy saǵat 11-de oqshaýlandy. Keltirilgen shyǵyn kólemi anyqtalýda. Órt sóndirý úshin jeke quramnan 38 qyzmetker men 10 arnaıy tehnıka jumyldyryldy. Elektr symdarynyń tuıyqtalýy saldarynan, klýb mańyndaǵy úıler toqtan ajyratyldy.
