Qostanaıdaǵy tanysynyń úıine kelgen astanalyq balasymen dalada qaldy
QOSTANAI. QazAqparat - Lısakov qalasynyń polıtseıleri bir balasymen dalada qalǵan astanalyq kelinshekke kómek kórsetti, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Lısakov qalasynyń polıtsııa bólimine bir balasy bar astanalyq kelinshek habarlasty. Aıtýynsha, ol Lısakov qalasynda turatyn er adammen ınternet arqyly tanysqan. Bul tanystyqtyń nátıjesinde er adam kelinshekti Lısakovqa qonaqqa shaqyrǵan.
Kóp uzamaı kelinshek balasymen birge Lısakov qalasyna keledi. Degenmen, tanysy ony qys ýaqytyna qaramastan úıine kirgizbegen. Osyndaı qıyn jaǵdaıda qalǵan astanalyq polıtseılerge júgingen.
«Kelinshek balasymen medıtsınalyq mekemeni 3 kún panalaǵan. Keıin polıtseıler áıelge quqyqtyq, psıhologııalyq keńes berip, Astanaǵa jol júrýge járdemdesti. Ana men bala tolyq medıtsınalyq tekserýden ótti», - dedi polıtsııa departamentiniń baspasóz qyzmetindegiler.
