Qostanaıdaǵy sý jelilerinde 1 myńnan astam apatty jaǵdaı tirkelgen
QOSTANAI. QazAqparat - Byltyr oblystyń sý jelilerinde 1034 apatty jaǵdaı tirkelgen. Bul týraly oblys ákimdiginiń óńirlermen selektorlyq otyrysynda málim etildi, dep habarlaıdy QazAqparat.
Sýmen jabdyqtaý nysandarynyń sanıtarlyq-tehnıkalyq jaǵdaıy men tutynatyn sý sapasy týraly oblystyq Qoǵamdyq densaýlyqty qorǵaý departamenti basshysy qyzmetin atqarýshy Vladımır Nechıtaılonyń baıandamasy tyńdaldy. Onyń sózinshe, aýyz sý sapasynyń tómendiginen jappaı dertke shaldyǵý faktory eki myńynshy jyldardyń basynda kóptep kezdesken.
«Sý sapasynyń tómendiginen 2001 jyly Arqalyq qalasynda - 261 adam, 2003 jyly Áýlıekól aýdanyndaǵy Tımofeev aýylynda - 93 adam, 2007 jyly Meńdiqarada aýdanynda 63 adam aýyrǵan. Qazir mundaı máseleler joq, degenmen onyń aldyn alý úshin biraz jumys oryndalýy tıis. 2017 jyly sý jelilerinde 1034 apatty jaǵdaı tirkelgen, onyń 877-i qubyrdyń tozýynan. Sol sebepti, biz oblys turǵyndary tolyqtaı sapaly aýyz sýǵa qol jetkizip otyr dep aıta almaımyz. Sondyqtan aldaǵy ýaqytta mıkrobıologııalyq baqylaýdy kúsheıtý kerek. Sebebi, byltyr 2306 qubyr sýy synaqtan ótkizilse, onyń 34-i sapasyz bolyp shyqty», - dedi V.Nechıtaılo.
Vladımır Nechıtaılonyń aıtýynsha, 2017 jyly 84 sý qubyry arnaıy zertteýge alyndy. Nátıjesinde, 46 sý jelisinen aqaý tabylǵan. Óz kezeginde oblys ákimi tutynatyn sý sapasyn jaqsartý jumystary boıynsha energetıka jáne turǵyn-úı kommýnaldyq sharýashylyǵy basqarmasynyń basshysy Almat Isenbaevqa tapsyrma berdi. 
Belgili bolǵandaı, bıyl Qostanaı aýdanynyń Arqa jáne Aǵashtykól aýyldary ortalyqtandyrylǵan sý júıesine qosylady. Ol jerlerde 2 myńǵa jýyq adam turady. Sondaı-aq 7 eldi mekenniń sýmen qamtamasyz etý jelisi jańartylady. Barlyǵy 50 myń turǵyn sapaly sýmen qamtylmaq. Óńirlerdi damytý baǵdarlamasy boıynsha bul jumystarǵa 5 mıllıard tenge bólingen. Bul ótken jylǵa qaraǵanda eki ese kóp. Aldaǵy ýaqytta 16 aýylǵa sý qubyryn tartyp, 8 eldi mekenniń eski sý júıesin jańartý josparlanyp otyr.
