Qostanaıdaǵy sanatorıı qyzmetkerleriniń 4,7 mln teńge jalaqysyn bere almaı otyr
QOSTANAI. QazAqparat - Qostanaı oblysynda mekemeler jumysshylarynyń 4,7 mıllıon teńge jalaqysyn bere almaı otyr. Bul týraly oblys ákiminiń orynbasary Marat Júndibaev keńeıtilgen májiliste aıtty, dep habarlaıdy QazAqparat.
Qoldanystaǵy eńbek zańnamasyna sáıkes, jumys berýshi men qyzmetker arasyndaǵy eńbek qatynastaryn retteýde ujymdyq kelisimshartqa erekshe mán beriledi. Osy oraıda, oblys boıynsha 6 myńnan astam ujymdyq shart jasalǵan, ıaǵnı kásiporyndardyń ujymdyq shartpen qamtylý úlesi 57,8 paıyzdy quraıdy. Bul respýblıka boıynsha 8-shi kórsetkish. Al, eńbek salasyndaǵy qaqtyǵystarǵa, narazylyqtarǵa áser etetin mańyzdy faktorlardyń biri - jalaqyny ýaqytyly tólemeý.
«Jalaqy boıynsha bereshekti óteý máselesi - Eńbek ınspektsııasynyń basym baǵyty bolyp otyr. Jyl basynan beri Qostanaı oblysynda 1 540 qyzmetkerdiń jalaqysy oblystyq prokýratýra, qala men aýdan ákimdikteri jáne basqa da múddeli organdardyń aralasýymen tólendi. Bul - 118,5 mln teńge. Búginge deıin orta jáne shaǵyn, iri kásipkerlik sýbektilerine, sondaı-aq, memlekettik organdar men ekonomıkanyń memlekettik sektoryndaǵy kásiporyndarǵa 870 shaǵym kelip túsken. Olar ýaqytynda qaralyp, 432 tekseris júrgizildi», - dedi Marat Júndibaev.
M. Qarabaev atyndaǵy Qostanaı oblystyq týberkýlezge qarsy sanatorıiniń qyzmetkerlerge bereshek jalaqy mólsheri 4,7 mln teńgege jetti. Barlyǵy 132 qyzmetker jalaqysyn ýaqtyly ala almaı otyr.
Oblys ákimi Arhımed Muhambetov sanatorıı basshylaryn sózge tartty. Olardyń aıtýlarynsha, qyrkúıek aıynyń jalaqysy tek qarashada ǵana tólenedi.
«Sizder memlekettik mekemeni basqarasyzdar. Biraq, jumystaryńyzda eshqandaı júıe joq. Bólingen aqshany durys ıgere almaı otyrsyzdar. Sol 132 adamnyń nesıesi bolýy múmkin. Olar aı saıyn eńbekaqylaryn kútip otyrady. Al sizderdiń is-áreketterińiz mynaý. Bulaı bolmaıdy. Kelesi apta maǵan túsinikteme hat ákelińizder. Barlyq qyzmetkerdiń jalaqysy osy aıdan qalmaı tólensin. Basqa satyp alýlardy ysyryp qoıyńyzdar. Muny óz baqylaýyma alamyn», - dedi óńir basshysy.
Áýlıekól aýdany boıynsha «Asmadın Prodjekt» JShS, Qarasý aýdanyndaǵy «Ramazan-Qarasý» JShS, Jitiqara kentindegi «Toqtar GRK» JShS qyzmetkerleriniń eńbekaqysyn áli bergen joq. Oblys ákimi atalǵan aýdandardyń ákimderine jalaqy máselesin tez arada sheshýdi tapsyrdy.
