Qostanaıdaǵy Prezıdent rezıdentsııasy balalardy emdeý ortalyǵy bolady
«Memleket basshysynyń tapsyrmasyna sáıkes, aımaqtyq rezıdentsııanyń aldaǵy ýaqyttaǵy qyzmetin aıqyndaý maqsatynda Qostanaı oblysy ákimdigi janynan arnaıy jumys toby qurylyp, qoǵam ókilderi men múddeli memlekettik organdardyń birqatar usynys, tilekteri tyńdaldy. Jumys tobynyń sheshimimen aımaqtyq rezıdentsııany psıhonevrologııalyq aýytqýǵa ushyraǵan jáne tirek-qımyl qozǵalysyna zaqym kelgen balalarǵa arnalǵan Reabılıtatsııalyq ortalyqqa beıimdeý týraly sheshim qabyldandy. Rezıdentsııany reabılıtatsııalyq ortalyqqa aınaldyrý maqsatynda jergilikti bıýdjetten qarjy qarastyrylady», - dep málim etti ákimdiktiń baspasóz qyzmetinen.
Málim bolǵandaı, bıyl ǵımaratty qaıta jabdyqtaý boıynsha jobalaý-smetalyq qujattary ázirlenedi.
«Rezıdentsııa aýmaǵynda barlyǵy 6 turǵyn úı jáne sanıtarlyq korpýs ornalasqan, olar múgedektigi bar adamdardyń yńǵaıyna saı jańartylatyn bolady. Sondaı-aq, irgeles aýmaqty abattandyrý josparlanýda. Eń úlken ǵımaratta arnaýly áleýmettik qyzmetter, onyń ishinde áleýmettik-pedagogıkalyq, áleýmettik-mádenı, áleýmettik-medıtsınalyq, áleýmettik-eńbek qyzmetterin kórsetý úshin kabınetter ornalastyrý josparlanǵan», - dep túsindirdi baspasóz qyzmetinen.
Al qalǵan turǵyn úı ǵımarattary ońaltý ortalyǵynyń mamandaryn ornalastyrý úshin paıdalanylady.
