Qostanaıdaǵy Prezıdent rezıdentsııasy: ákimdik jýyrda nysannyń jańa profılin tańdaıdy

ASTANA. QazAqparat – Memleket basshysynyń tapsyrmasy boıynsha, ózge birqatar óńirdegideı Qostanaı qalasyndaǵy Prezıdent rezıdentsııasy da balalar ıgiligine berilmek. Ázirge keshenniń qandaı maqsattaǵy mekemege aınalatyny týraly naqty sheshim qabyldanǵan joq, dep habarlaıdy QazAqparat tilshisi.

Qostanaı oblysynyń ákimdigi bergen málimetke súıensek, arnaıy jumys toby jasaqtalyp jatyr. Onyń músheleri oblys ortalyǵynan qashyq ornalasqan keshen bazasynda balalarǵa arnalǵan naqty qandaı nysan qurylatynyn sheshedi. Másele jaqyn kúnderi sheshimin tappaq. Ýáde etilgendeı, qorytyndy uıǵarym resmı túrde jarııalanady.

«Memleket basshysynyń tapsyrmasy oryndalady. Qazir ǵımaratty ótkizý jáne ony paıdalaný mehanızmi qarastyrylyp jatyr. Qabyldanatyn sheshim týraly qosymsha habarlaımyz», - dedi Qostanaı oblysy ákiminiń baspasóz hatshysy Jumataı Kákimjanov.

Qazir burynǵy Prezıdent rezıdentsııasy áli de erekshe qorǵalatyn nysandar qatarynda. Onda kirýge ruqsat joq.

Buǵan deıin habarlanǵanyndaı, oblys ákimdikteri rezıdentsııalar ǵımarattaryn paıdalaný maqsatyn (balabaqsha, saýyqtyrý ortalyǵy, demalys orny, t.b.) óńirdiń qajettiligine qaraı jergilikti jerde sheshedi.

Buǵan deıin Aqtóbe ákimdigi burynǵy Prezıdent rezıdentsııasynyń balalarǵa arnalǵan demalys nemese saýyqtyrý ortalyǵyna aınalatynyn rastaǵan edi.

Foto: Qostanaı oblysynyń ákimdigi