Qostanaıdaǵy órtti sóndirýge Ulttyq ulannyń 400-ge jýyq sarbazy jumyldyryldy

QOSTANAI. QazAqparat – Qostanaıdaǵy alapat órtti aýyzdyqtaýǵa Ulttyq ulannyń 400-ge jýyq áskerı qyzmetshisi jumyldyryldy. Bul týraly Ulttyq ulannyń baspasóz qyzmetinen málim etti, dep habarlaıdy QazAqparat tilshisi.

«4 qyrkúıek kúni Qostanaı oblysy Áýlıekól aýdanyndaǵy Amanqaraǵaı, Novonejın aýyldarynyń mańynda órt órshı bastaǵany týraly aqparat tústi. Osyǵan baılanysty Ulttyq ulannyń Bas qolbasshysy, general-maıor Erkin Botaqanovtyń sheshimimen órt ornyna Qostanaı qalasyndaǵy 6697, Kókshetaý qalasynyń 5510 áskerı bólimderi jumyldyryldy. Tótenshe jaǵdaıdy joıý boıynsha 6697 áskerı bólimnen 150-ge jýyq, al 5510 áskerı bólimnen 250-den astam áskerı qyzmetshi jáne 18 tehnıka bólindi», - delingen Ulttyq ulannyń baspasóz qyzmeti taratqan habarlamada.

Áskerı qyzmetshiler órt oshaqtary men tilsiz jaý áli sharpymaǵan jerlerdiń arasyn arnaıy tehınkanyń kómegimen jyryp, qalǵan aýmaqtary saqtap qalý úshin tıisti jumystar júrgizip jatyr.

Eske salaıyq, buǵan deıin tótenshe jaǵdaılar mınıstri ıÝrıı Ilın órt sebeperin anyqtaý boıynsha qylmystyq is qozǵalǵanyn málimdedi. Onyń aıtýynsha, tısti organdar órt qasaqana adam qolynan boldy degen nusqany da qarastyrady.

Al, mınıstrliktiń resmı ókili Talǵat Ýálıdiń aqparaty boıynsha, órt kezinde jaraqat alǵan 10 adamnyń tórteýi aýrýhanada jatyr.