Qostanaıdaǵy órt: Jaryqtan ajyratylǵan áıel páterinde qoqys jaǵyp kelgen
QOSTANAI. QazAqparat - Qostanaı oblystyq Tótenshe jaǵdaılar departamenti Qobylandy batyr kóshesindegi turǵyn úı órtiniń shyǵý sebebin atady, dep habarlaıdy QazAqparat tilshisi.
Eske salsaq, oqıǵa5 qarasha kúni boldy . Tún jarymda 64 adam qaýipsiz jerge shyǵaryldy. Órt shyqqan páterden 1960 jyly týǵan áıeldiń máıiti tabyldy.
«Áıel adam burynnan óz ómirine selqos qaraǵan. Іshimdikke únemi áýes bolǵan. Muny kórshileri rastap otyr. Onyń páteri elektr jaryǵynan aǵytylǵan. Sol sebepti, túnde úıdiń ishine qoqys jaǵyp kelgen. Turǵyn úı órtiniń shyǵý sebebi osy bolýy múmkin. Buǵan deıin de bizdiń qyzmetkerler áıeldiń páterine birneshe ret baryp, órt qaýipsizdigi týraly túsindirme jumystaryn júrgizgen», - dedi oblystyq TJD bastyǵynyń orynbasary Azamat Orynbaev.
Órt sóndirýshilerdiń aıtýynsha, oblystaǵy turǵyn úı órti kóp jaǵdaıda balalardy qaraýsyz qaldyrý jáne mas kúıde temeki shegý saldarynan týyndap otyr. TJD qyzmetkerleri qazirge deıin qaladaǵy 2657 aýlany aralap, turǵyndardy órt qaýipsizdigin saqtaýǵa shaqyrýda.
Jylytý maýsymy bastalǵaly beri óńir boıynsha 37 turǵyn úı órti bolyp, 3 adam kóz jumdy.
