Qostanaıdaǵy órt kezinde jaraqat alǵan 4 adam aýrýhanada jatyr

QOSTANAI. QazAqparat – Órt kezinde jaraqat alǵan 10 adamnyń tórteýi aýrýhanada jatyr. Bul týraly Qostanaı oblysyndaǵy órtke baılanysty uıymdastyrylǵan jedel brıfıngi barysynda tótenshe jaǵdaılar mınıstrliginiń resmı ókili Talǵat Ýálı aıtty, dep habarlaıdy QazAqparat tilshisi.

«Ókinishke qaraı, 1935 jyly týǵan bir adam qaıtys boldy. Sonymen qatar, 10 adam jaraqat alǵan bolatyn. Atap aıtqanda, qazir 4 adam dárigerlerdiń qaraýynda aýrýhanada jatyr. Al taǵy 6 adam dárigerlerdiń tekserýinen keıin óz úılerine jiberildi», - dep málim etti Talǵat Ýálı.

Mınıstrliktiń resmı ókili órt jaǵdaıy baqylaýda ekenin aıtty. Onyń aqparatyna saı, ashyq jalyn men sóndirý múmkin bolmaı jatqan órt oshaqtary joq.

Brıfıngi aıasynda tótenshe jaǵdaılar mınıstri ıÝrıı Ilın órt sebeperin anyqtaý boıynsha qylmystyq is qozǵalǵanyn málimdedi. Onyń aıtýynsha, tısti organdar órt qasaqana adam qolynan boldy degen nusqany da qarastyrady.

Buǵan deıin habarlaǵanymyzdaı, tótenshe jaǵdaılar mınıstri ıÝrıı Ilınniń málimeti boıynsha, Qostanaı oblysy Áýlıekól aýdanyndaǵy órt 43 myń gektardan astam aýmaqty sharpyǵan. Amanqaraǵaı aýylynda 98 úı órtenip ketti. 10 adamdy ortasha deńgeıde kúıik shalǵan jáne ýlanǵan. Sondaı-aq, Amanqaraǵaı aýylynda bir adamnyń máıiti tabyldy.