Qostanaıdaǵy orman alqabynan ónerkásiptik jarylǵysh zattar tabyldy
QOSTANAI. QazAqparat - Qostanaı oblysynda jeke sharýashylyq seriktestigi qyzmetkerleri orman alqabynan ónerkásiptik jarylǵysh zattar elementterin tapty, dep habarlaıdy QazAqparat.
Aqparatty oblystyq TJD baspasóz qyzmeti rastady. Atalǵan fakt 17 maýsym kúni Qonaı aýylynan eki shaqyrym jerde tirkelgen. «Inter-stıl» JShS qyzmetkerleri orman alqabynan ónerkásiptik jarylǵysh zattar elementterin tapqan.
«Seriktestik mamandary «Petrogen P-34» elementiniń 9 danasyn tapty. Biraq, olardyń tutatatyn pilteleri joq. Jarylǵysh zattar Qostanaı oblysy ІІD jedel tobyna tapsyryldy», - dedi TJD baspasóz qyzmetindegiler.
Oqıǵa ornynda 12 TJD jáne 6 jergilikti polıtsııa qyzmetiniń mamandary men UQK qyzmetkerleri jumys istedi.
