Qostanaıdaǵy murajaıǵa qýǵyn-súrgin jyldary sottalǵandardyń biregeı isteri qoıyldy

QOSTANAI. QazAqparat – Qostanaı oblysy polıtsııa departamentiniń murajaıynda Qýǵyn-súrgin qurbandaryn eske alý kúnine oraı ekskýrsııa ótýde, dep habarlaıdy QazAqparat tilshisi vedomstvonyń baspasóz qyzmetine silteme jasap.

Qostanaı oblysynyń polıtsııa departamentinde Qýǵyn-súrgin qurbandaryn eske alý kúnine oraılastyrylǵan biregeı ister kórmesi ótýde. Muraǵatta qýǵyn-súrgin jyldarynda zańsyz sottalǵan tórt myńnan astam adamǵa qatysty qylmystyq ister bar.

Murajaı saqtaýshysy Tańatqan Delmuhambetov kelýshilerge aıtýynsha, qýǵyn-súrginniń órshigen kezi – 1937 jyly atalmysh ister boıynsha sottalǵandarǵa eń qatań jazalaý sharalary taǵaıyndalǵan. Qýǵyn-súrgin qurbandaryna qatysty qylmystyq isterdiń basym bóligi RKFSR QK-niń 58-baby boıynsha qozǵalǵan. Ol antıkeńestik nasıhattaýǵa jaýapkershilikti qarastyrdy.

«Vedomstvonyń arnaıy memlekettik muraǵatynda saqtaýda zańssyz sottalǵan 4 349 adamǵa qatysty qylmystyq ister bar. Keıinnen olar aqtaldy. Bul – bizdiń elimizdiń tarıhyndaǵy mańyzdy kúnderdiń biri. Biz saıası qýǵyn-súrgin qurbandaryn árqashan esimizde saqtaımyz», - dedi T. Delmuhamedov.

Mysaly, muraǵatta Habıbýla Bashaevqa qatysty qylmystyq is saqtalǵan. Іspen birge kórmege Bashaevtyń fotosýretteri men 1937 jyly 27 qazanda jazylǵan kinásiz ekeni týraly aryzdyń túpnusqasy qoıylǵan. 1938 jyldyń aqpanynda KSRO Joǵary Sotynyń áskerı kollegııasymen atý jazasyna kesilgen, 1958 jyldyń 1 naýryzynda aqtaldy.

Qýǵyn-súrginge ushyrap, keıinnen aqtalǵan adamdar týraly qysqa aqparat QR ІІM-niń vedomstvolyq web-portaly «Memorıal» respýblıkalyq servısinde berilgen. Onyń arqasynda elimizdiń kez kelgen azamaty óziniń qýǵyn-súrginge ushyraǵan týystary týraly málimetter taba alady.

1921-1954 jyldar aralyǵynda Qazaqstanda 100 myń adam sottalyp, olardyń 25 myńy jazanyń eń aýyr túri – atý jazasyna kesilgen.

Qostanaı oblysynda eń aýyr jazaǵa 1 251 adam kesilgen, bul – qýǵyn-súrginge ushyraǵandardyń jalpy sanynyń 30%-dan astamy.