Qostanaıdaǵy memorgandarda 235 bos jumys orny bar
QOSTANAI. QazAqparat - Qostanaı oblystyq ákimdiginde memlekettik qyzmet kórsetýdiń sapasy talqylandy, dep habarlaıdy QazAqparat tilshisi.
2017 jyldyń 26 maýsymynda Qostanaı oblysynyń ákimi Arhımed Muhambetov barlyq qala, aýdan ákimderine memlekettik organdardaǵy bos oryndarǵa kadr tartý máselesin kótergen-di. Bul týraly oblys ákimi apparatynyń basshysy Arman Ábenov te dúısenbilik apparat májilisinde basa aıtty.
«Naýyrzym aýdanyndaǵy turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń jetekshisi laýazymy tórt jyldan beri, Uzynkól aýdanynda bas maman laýazymy eki jyldan beri bos tur. Denısov aýdanyndaǵy kásipkerlik jáne aýyl sharýashylyq bóliminiń sektor meńgerýshisi laýazymyna sońǵy bir jylda eshkim taǵaıyndalmaǵan. Jalpy, oblystyq basqarmalarda 46 bos jumys orny bar. Tamyz aıynda oblys boıynsha barlyq memorgandarda 250 bos oryn boldy. Qazir bul kórsetkish nebári 235-ke kemidi. Sonyń ishinde, densaýlyq saqtaý, qurylys, sáýlet jáne qala qurylysy, ekonomıka jáne bıýdjetti josparlaý, dene shynyqtyrý jáne sport, tabıǵı resýrstar jáne tabıǵat paıdalanýdy retteý, veterınarııa basqarmalarynda maman tapshy», - dedi Arman Ábenov.
Óńir basshysy Arhımed Muhambetov aýdan, qalalardyń ákimderine joǵaryda kórsetilgen máselelerdi retke keltirýdi tapsyrdy.
«Úsh aýdanda bas esepshi joq. Sondaı-aq, turǵyn úı-kommýnaldyq sharýashylyq bóliminiń jetekshisi laýazymynyń uzaq ýaqyt bos turýy durys emes. Elimizde jaqsy maman daıarlaıtyn joǵary oqý oryndary barshylyq. Jas mamandardy qyzmetke tartyp, tárbıelep, jaǵdaıdy sheshýge bolady. Bul máseleni tez arada durystaý kerek»,-dedi oblys ákimi.
