Qostanaıdaǵy Metsenattar klýby jyl úzdikterin marapattady
QOSTANAI. QazAqparat - Qostanaıda 18-shi márte oblystyq Metsenattar klýby taǵaıyndaǵan «Qazyna» jáne «Shabyt» syılyqtaryn tapsyrý saltanaty ótti, dep habarlaıdy QazAqparat tilshisi.
Aıta ketý kerek, elimizde teńdesi joq osynaý «Qazyna» jáne «Shabyt» syılyqtary 2000 jyldan beri tapsyrylyp keledi. Ataýly marapatqa «Ádebıet», «Beıneleý óneri», «Teatr óneri», «Mýzyka óneri», «Vokal óneri», «Horeografııa», «Jýrnalıstıka», «Ǵylym», «Mádenı mura», «Aýyl janashyry», «Bilim», «Shyǵarmashylyq ujym jetekshisi» nomınatsııalary boıynsha joǵary kásibı sheberligimen ozyp shyqqan alýan túrli salanyń mamandary ıe bolady. Sondaı-aq, bıyl metsenattar «Sport» atalymynyń úzdigine de syılyǵyn usyndy. Sharanyń ashylý saltanatyna sóz sóılegen oblys basshysy Arhımed Muhambetov metsenattarǵa alǵysyn aıtty.
«Kásipkerlerimiz óńirdiń damýyna úles qosyp kele jatqan, eńbegimen oq boıy ozyq shyqqan sala mamandaryna qarjylaı demeý kórsetip otyrady. Bir qýantatyny, jyldan jylǵa Metsenattar klýby syılyǵyna úmitkerler qatary kóbeıip keledi. Osydan tórt jyl buryn nebári 80 adam qatyssa, bıyl 150 úmitker tirkeldi. Eńbekteri elengen jyl úzdikterin quttyqtaımyn. Al kásipkerlerimizge óz atymnan alǵysymdy bildiremin. Jomart jandardyń áli talaı ıgi bastamaǵa muryndyq bolatynyna senimdimin», - dedi oblys ákimi Arhımed Muhambetov óziniń quttyqtaý sózinde.
Metsenattar ótken 18 jyl ishinde quny 226 mıllıon teńge bolatyn 448 syılyq tapsyrypty. «Jýrnalıstıka» atalymynda «Shabyt» syılyǵyn alǵan «Qostanaı tańy» gazetiniń tilshisi Kenje Qonysbaıdyń sózinshe, mundaı syılyqtar jastar talǵamyn arttyrýǵa septigin tıgizedi.
«Bir jyl boıy atqarǵan jumysyń elenip jatsa, odan asqan qýanysh joq. Sebebi, búgin sahnaǵa shyǵyp, syılyqtaryn alyp jatqandardyń bári óz salalarynda joǵarǵy jetistikke jetti. «Shabyt» syılyǵy óz atyna saı, ár jasty shabyttandyrady. Áli de izdenýge serpin beredi», - deıdi jeńimpaz.
