Qostanaıdaǵy qus fabrıkasy jylyna 250 mln dana jumyrtqa óndiredi
QOSTANAI. QazAqparat - Qostanaıda jumys saparymen júrgen QR vıtse-premeri, aýyl sharýashylyǵy mınıstri Ómirzaq Shókeev búgin birneshe óndiristik nysandy aralady, dep habarlaıdy QazAqparat.
Ómirzaq Shókeev aldymen Rýdnyı qalasyndaǵy tsement zaýytynyń jumys barysymen tanysty. Atalǵan zaýyttyń qurylysy 2012 jyly bastalǵan. Alaıda, qarjy jetispegendikten qurylys jumystary keıinge shegerilgen edi. Jańa óndiris oshaǵy ústimizdegi jyldyń maýsym aıynda iske qosyldy. Tsement zaýyty jylyna 500 myń tonna tsement óndiredi. Jaqynda zaýyt ishindegi aınalmaly peshtiń qosý-baptaý jumystaryn júrgizý úshin arnaıy qurylǵylar satyp alyndy. Jergilikti mamandarǵa tsement peshiniń baptaýlaryn úıretý úshin Belogorod tehnıkalyq ýnıversıtetiniń qyzmetkerleri kelmek. Qazir kásiporynda 216 jumysker bar.
Ómirzaq Shókeev Rýdnyı qalasynda «Jas Qanat - 2006» JShS-de boldy, onda «Tsıfrlyq Qazaqstan» memlekettik baǵdarlamasy aıasynda iske asyrylyp jatqan «Aqyldy qus fabrıkasy» pılottyq jobasynyń jumysymen tanysty. Kásiporyndy aralaý kezinde «Jas Qanat - 2006» JShS dırektory Qaırat Maıshev mınıstrge syrtqy saýdanyń jaı-kúıi týraly baıandady.
«Óndiristi avtomattandyrý segiz saǵattyq jumys kúninde mıllıonǵa jýyq jumyrtqany tasymaldaýǵa jáne qaptaýǵa múmkindik beredi. Óndiriletin ónim elimizdiń barlyq óńirlerinde satylyp, Reseıge, Aýǵanstanǵa, Tájikstanǵa jáne Qyrǵyzstanǵa eksporttalady. Bıyl ónimdi Iran men Qytaıdyń jańa naryqtaryna eksporttaýdy bastamaqpyz. Sonymen qatar aldaǵy úsh jylda tsıfrlyq tehnologııalarǵa 2 mlrd teńgege jýyq ınvestıtsııa salý josparlanyp otyr. ERP (Enterprise Resource Planning) júıesin engizý tehnologııalyq protsesterdiń sapasyn jaqsartýǵa jáne óndiristik máselelerdi jedel sheshýge, sonyń ishinde qashyqtan sheshýge jol ashady. Budan ózge, odan ári jańǵyrtý aıasynda jumyrtqany, et jáne basqa da ónimderdi tereń óńdeýge arnalǵan avtomattandyrylǵan jelini iske qosý múmkindigi qarastyrylady», - dedi Q.Maıshev.
«Jas Qanat - 2006» JShS jańǵyrtýdyń úsh kezeńinen ótti, barlyq qajetti ınfraqurylym quryldy, eń joǵary tehnologııalyq jabdyqtar satyp alyndy. Búginde ınvestıtsııalar kólemi 3 mlrd teńgeden asady. Protsesterdi avtomattandyrý jumyrtqa óndirisin jylyna 7 mln-nan 250 mln danaǵa, et óndirisin 500 tonnaǵa deıin ulǵaıtýǵa múmkindik berdi.
Qazirgi ýaqytta fabrıkada 1,4 mln qus bar. Suryptaý tsehynda qýattylyǵy saǵatyna 120 myń jumyrtqany tazalaıtyn japondyq «Nabel» jabdyǵy bar. Budan ózge, kásiporynda jumyrtqa salatyn qoraptar shyǵarý jelisi iske qosyldy.
«Birinshi besjyldyqta jylyna 20 mıllıon dana jumyrtqa qanaǵat sekildi kóringen, biraq ýaqyt óte kele óndiris kólemin arttyrý talabyn oryndaýǵa kóshtik. Endigi jerde jylyna 250 mıllıon dana jumyrtqa shyǵarýdy qalypty normaǵa aınaldyrdyq. Biraq alda taǵy básekelesińniń ónim kólemi ulǵaıa beretin bolsa, sol kásiporynmen terezeńdi teń ustaýyń kerek», - deıdi fabrıka dırektory.
Ómirzaq Shókeev «Jas-Qanat 2006» JShS jumysyna oń baǵa berdi. Mınıstrdiń aıtýynsha, báseke Qazaqstanmen ǵana shektelip qalmaıdy, sol úshin de jańa jobalardy qolǵa alý qajet.
