Qostanaıdaǵy qurǵaqshylyq dándi daqyldardyń ósýine kedergi jasap otyr
QOSTANAI. QazAqparat – Qostanaı oblysynda egis alqaptaryn ártaraptandyrý men maıly daqyldardyń úlesin arttyrýǵa kóńil bólinbek. Bul týraly oblystyq aýyl sharýashylyǵy basqarmasynyń basshysy Jansultan Táýkenov jýrnalıstermen ótken kezdesýde aıtty, dep habarlaıdy QazAqparat.
Jyl basynan beri oblysta aýyl sharýashylyǵy ónimderinen 79,8 mlrd teńge paıda túsken. Endi egis alqaptaryn ártaraptandyrý, maıly daqyldardyń úlesin arttyrýǵa kóńil bólinedi. Máselen, dándi daqyldardyń, onyń ishinde bıdaıdyń tómendeýi esebinen maıly daqyldardyń kólemin ulǵaıtý jumystary bastalady.
«Aýyl sharýashylyǵy daqyldarynyń egistik alqaby 5 mln gektarǵa quraıdy.Onyń ishinde dándi-burshaqty daqyldar 3 mln 968 myń gektar alqapqa egilgen. Búginde maıly daqyldar kólemi 510 myń ga deıin ulǵaıdy. Tuqym sharýashylyǵyn damytýdyń jańa erejelerin erejeleri engizilgennen keıin sebiletin tuqymdardyń sapasy aıtarlyqtaı artty. Aǵymdaǵy jyly aýyl sharýashylyǵy taýaryn óndirýshiler 223 myń tonna biregeı, elıtalyq jáne birinshi kóbeıtilgen tuqymdardy satyp aldy», - dep málimet berdi Jansultan Táýkenov.
Óńirde jem-shóp daqyldarynyń kólemi 562 myń gektarǵa jetti. Sonymen qatar, 9,3 myń ga kartop, 2,4 myń ga kókónis, 290,5 gektarǵa baqsha daqyldary egildi. Kóktemgi egis jumystary úshin oblystyń aýyl sharýashylyǵy mamandary «QazAgro» UBH» aktsıonerlik qoǵamynyń qarjy ınstıtýttary arqyly 14,2 mlrd teńge nesıe aldy.
«Bıyl jerdi utymdy paıdalaný talaptaryn saqtap, 44 myń tonna mıneraldy tyńaıtqysh satyp aldyq. Bul ótken jyldyń kóleminen 2 esege artyq. Bul baǵyttaǵy jumys toqtap qalmaıdy. Alqaptarǵa tyńaıtqysh sebý de jalǵasady. 3,4 mln gektar jerde aramshópterge, zııankesterge qarsy hımııalyq óńdeý júrgizildi», - dedi basqarma basshysy.
Aýyl sharýashylyǵy taýaryn óndirýshiler úshin bıylǵy aýa raıy qolaıly bolmaı tur. Qurǵaqshylyq dándi-daqyldardyń ósýine aıtarlyqtaı kedergi. Ásirese, oblystyń ońtústik aýdandaryndaǵy eginniń shyǵymyna áser etken.
Jansultan Táýkenovtiń sózinshe, kúzgi dala jumystaryn júrgizýge jeńildetilgen baǵa boıynsha 75 myń tonna dızel otyny bólindi. 1 lıtrdiń quny - 187 teńgeden aspaıdy.
