Qostanaıdaǵy koreı qaýymdastyǵy jastarǵa úndeý joldady
Oblystyq Qazaqstan halqy Assambleıasynyń múshesi Qalqaman Jaqyptyń sózinshe, bul jolǵy saılaý - der kezinde qabyldanǵan sheshim boldy.
«2019 jyldyń 9 maýsymynda mańyzdy saıası oqıǵa - Qazaqstan Respýblıkasy Prezıdentiniń kezekten tys saılaýy ótedi. Táýelsiz el retinde Memleket basshysyn altynshy ret saılamaqpyz. Osy jyldar ishinde Elbasy elimizdi bıik belesterge jeteledi. Ol naýryz merekesi qarsańynda el tizginin Qasym-Jomart Toqaevqa ustatty. Saılaý - el ómirindegi mańyzdy kezeń. Árbir azamat óziniń jáne memleketiniń taǵdyry úshin jaýapkershilikti túsinýi tıis», - deıdi Qalqaman Jaqyp.
Forým barysynda oblystyq koreı qaýymdastyǵy tóraǵasynyń orynbasary Ýlıana Kım jastarǵa arnalǵan úndeýdi oqyp berdi.
«Kezekten tys saılaý adamdardyń belsendi azamattyq ustanymyn bildirýine múmkindik týǵyzady. Elimizdiń aldynda turǵan barlyq mindetterdi sheshý úshin halyqty bir arnaǵa jumyldyrýǵa qýatty serpin beredi. Sizder, jastar ózderińizdiń otansúıgishtik sezimderińizdi kórsetip, saılaýǵa qatysyp, laıyqty úmitkerge daýys berip, azamattyq boryshty oryndańyzdar», - dedi Ýlıana Kım.
Óz kezeginde etnomádenı birlestikter, jastar kóshbasshylary, «Jańǵyrý joly» respýblıkalyq jastar qozǵalysynyń belsendi músheleri, joǵary polıtehnıkalyq kolledj ben Qostanaı pedagogıkalyq kolledjiniń shyǵarmashylyq ujymdary alda bolatyn kezekten tys saılaýǵa qoldaý bildirdi.
