Qostanaıdaǵy kommýnaldyq qyzmetter tarıfin arzandatý qajet - Májilis depýtaty
Halyq qalaýlylary oblystyq máslıhat depýtattarymen jáne «Nur Otan» partııasynyń ókilderimen kezdesip, sapar maqsaty týraly baıan etti. Jumys tobynyń jetekshisi Gleb Shegelskııdiń aıtýynsha, depýtattar óńirdiń birneshe aýdanyn aralap, halyqpen kezdespek.
«Bizdiń Qostanaıǵa kelýdegi basty maqsatymyz - halyqpen kezdesip, óńir turǵyndarynyń turmysy men ómirine Elbasy reformalary qanshalyqty deńgeıde áser etip jatqanyn óz kózimizben kórip-bilý. Kommýnaldyq qyzmet tólemderiniń mólsherin azaıtý boıynsha óńirde qandaı sharalar atqarylyp jatqanyn bilý de mańyzdy. Óıtkeni bul salada áli de sheshimin tappaı jatqan túıtkildi másele kóp. Kommýnaldyq tarıf qunyn azaıtý qajet. Buǵan qosa, dúkenderge kirip, azyq-túlik baǵasyn baǵamdap, zeınetkerlermen tildesip, áleýmettik ahýalmen tanysý maqsatynda keldik. Biz óńirdiń birqatar qala-aýdandaryn aralap, el pikirin bilmekpiz. Jol sapasyn baqylaımyz», - dedi depýtat.
Aıta keteıik, Qostanaıǵa Quralaı Qaraken, Arman Qojahmetov, Olga Shıshıgına, Snejanna Imasheva sııaqty Májilis depýtattary keldi. Olar erteń Rýdnyı qalasyndaǵy «Sokolov-Sarybaı» ken baıytý kombınatyna barady, sonymen qatar kenshiler qalasyndaǵy Tsement zaýytynyń óndirisimen tanysyp, jergilikti dárigerlermen kezdesedi.
Odan keıin depýtattar Sarykól, Qarabalyq, Denısov, Qamysty aýdandaryna baryp, birqatar áleýmettik mańyzdy nysandardy aralaıdy.
