Qostanaıdaǵy qoǵamdyq kólikterde jańa tólem júıesi engiziledi

QOSTANAI. QazAqparat – Qostanaı oblysynda 260 avtobýs valıdatorlarmen jabdyqtaldy, dep habarlaıdy QazAqparat tilshisi Qostanaı qalasy ákiminiń baspasóz qyzmetine silteme jasap.

Qostanaı qalasynda 2021 jyldyń 1 qańtarynan bastap qoǵamdyq kólikterde elektrondy tólem júıesi engiziledi. Al jańa jylǵa deıin qoǵamdyq kólikterdegi jolaqy tóleý tártibi burynǵydaı saqtalady.

«2021 jylǵy 1 qańtardan bastap karta arqyly 80 teńge, qolma qol tóleý 150 teńge bolady. Kartanyń úsh túri bar: balalarǵa, zeınetkerlerge jáne eresekterge arnalǵan. Olar arnaıy tústermen erekshelenedi. Ár kartada onyń ıesi týraly málimetter jınaqtalady. Eger karta joǵalyp qalsa, qaıtadan qalpyna keltiriledi. Kólik kartasynyń quny – 370 teńge. Sondaı-aq jolaqyny kez kelgen bank kartasy, uıaly telefondaǵy qosymshalary, QR-kod pen SMS-tólem arqyly da tóleýge bolady», - deıdi Qostanaı qalasy ákimdiginiń turǵyn úı-kommýnaldyq sharýashylyq bóliminiń basshysy Naýryzbaı Mýsın.

Jańa jobany «Alempaı» JShS júzege asyrady. Qazirgi ýaqytta valıdatorlar 260 avtobýsqa qoıylǵan.